盆菜事件一個月 雪姨再出片教人斷捨離兼派快測套裝 網民唔收貨

網紅雪姨過年前出咗條片，以街坊茶餐廳盆菜同大酒店作比較出食評，並鬧爆前者出品份量細，結果被網友瘋狂負評，指責佢咁樣作比較完全不合情理，有踩低小店抬高酒店之嫌。事後有關酒店割席，表明係雪姨自己買盆菜試食，片段出現過嘅護髮產品亦表示「沒有參與任何關於食物評價的對白創作」。最後雪姨要向茶餐廳道歉，並將片段下架。

向來密密出片嘅雪姨，事後「潛水」一個月，直到日前先再出片，題材同以往飲飲食食唔同，而係教觀眾斷捨離。佢揀咗5樣要丟嘅物品出嚟，好似第一年搞市集推出嘅年曆、巨型貓屋等，又講咗儲起啲物件嘅原因，例如要掉貓屋因為貓貓患病，另一隻就急病過身，藉此叫大家珍惜眼前人。條片似係俾雪姨抒發個人感受，多過真係教觀眾斷捨離。

片段下面唔少人留言，有人認為雪姨依然冇拍片就事件道歉，亦有人睇完覺得「更明確顯示你的確係唔能夠認輸的人」，甚至明言提及貓貓離世係搏同情。

當然亦有fans留言打氣︰

另一方面，雪姨尋日喺IG出post表示預備咗500套新冠快測套裝，送畀長者及有需要家庭。不過有留言認為雪姨係為咗洗底先咁做。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！