私下鬧爆梁詠琪演唱會唱得差 商台DJ梁文禮向Gigi道歉

（更新︰今日梁文禮如常主持節目《叱咤樂壇》，一開始就交代事件，並向梁詠琪道歉。阿禮多次以「肉緊」嚟解釋點解要喺私人帳戶批評Gigi演唱會。佢認同一個演出可以有好多個面向，希望可以透過睇碟重溫等方式，以另一角度欣賞。梁文禮自言多年來都有聽梁詠琪嘅歌，4次演唱會都有睇，今次「負評」事件後寫咗一大段字「向梁詠琪示愛」，但因為自己冇對方嘅聯絡方法，於是透過同Gigi友好嘅商台DJ Vani，將呢段字send俾Gigi。）

梁詠琪一連三場嘅紅館演唱會剛剛完成，唔少圈中人都有捧場，仲會喺社交平台發相發文。商台音樂節目主持人梁文禮都係座上客，佢仲出咗個限時動態大讚Gigi好靚。

不過疑似阿禮嘅私人facebook就講咗另一番說話，狠批Gigi演唱會由編排、編曲、舞蹈以至服裝都一無是處，仲大鬧Gigi唱得差︰

「個flow差，歌編得差，舞差

當然佢唱得差啦~

其實都預咗，但係無諗過咁離譜

唱K咁！！連《愛自己》都入唔到呀大佬

我全晚都睇得好掹，坐立不安……

唯一想讚嘅係，佢短頭髮真係好靚好襯佢

身形好，將啲醜嘅衫都carry得好

好似呢件『著上一張抹完鼻血嘅紙巾』咁。」

最尷尬嘅係，阿禮公開帳戶讚Gigi嘅post，同私底下鬧嗰個post，都係用同一張相，難怪被網友批評佢係「雙面人」。阿禮暫時未有公開回應，但係私人account已經改咗名。而Gigi喺尋晚演唱會後被問到點睇阿禮負評，佢話每個人都會抱住期望或者標準去睇一個作品，自己盡咗最大努力，未必符合到每個人嘅期望，「不過唔緊要，我仲會繼續做㗎嘛，我仲有進步嘅時間，所以希望大家俾時間我進步，繼續再做好啲」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！