笑匠Jack Black樂隊隊友抽水特朗普中槍「下次射準啲」惹爭議 宣布取消巡迴演出︳電影LOL

美國喜劇演員Jack Black另一個身份係band友，佢組咗隊樂隊Tenacious D仲玩咗好多年，甚至係有人邀請出show嗰種級數，唔係業餘水平！不過Tenacious D早幾日喺澳洲開show就出事嘞。

是咁的，Tenacious D上周末演出時，大會為另一成員Kyle Gass慶祝生日，都係推個蛋糕出嚟嗰啲啦。被問到有咩生日願望，Kyle Gass用發生冇耐兼轟動全球嘅特朗普中槍事件抽水，話希望「下次唔好打唔中阿侵」（Don't miss Trump next time），因此引起爭議。需知道美國社會對呢件事相當關注，今次Kyle Gass真係抽水抽著火水。

喺星期二，Kyle Gass發文道歉，認為自己當時言論「非常唔妥當、危險而且係差劣嘅錯誤」。而Tenacious D亦宣布取消喺澳洲及紐西蘭餘下演出場次，並暫停一切創作。Jack Black同樣為事件表態，佢話自己絕不縱容仇恨言論，或者鼓勵任何形式嘅政治暴力。Jack Black又指當時Kyle Gass嘅言論令佢措手不及。Jack Black支持美國總統拜登都唔係咩收收埋埋嘅事，今次Kyle Gass嘅言論唔單止令佢身份尷尬，更令拜登陣容再多樣嘢要煩。

成軍30年嘅Tenacious D ，兩位成員Jack Black同Kyle Gass都係喜劇演員，難怪台上講嘢咁搶口。2000年Jack Black憑電影《失戀排行榜》彈起，帶挈Tenacious D 喺2001年有機會出碟，甚至賣到白金銷量。早前Jack Black為電影《功夫熊貓4》主角阿寶配音，片尾曲嘅新版本Baby One More Time正係由Tenacious D操刀。

更多電影文章

玩轉腦朋友2／全謊位登月／DDDD惡魔的破壞 前章︳電影LOL 今期睇咩戲

許光漢王淨歸隊查案《關於我和鬼變成家人的那件事》被Netflix睇中拍外傳劇 《正港警局》︳電影LOL

居然唔太得人驚嘅殭屍片？《人道主義吸血鬼徵求自願獻身者》︳電影LOL

《孤獨的美食家》拍電影版 松重豊自編自導自演 五郎由日本食到去法蘭西？︳電影LOL

《長腿Longlegs》被譽為近十年最恐怖電影 尼古拉斯基治參考阿媽演殺人狂︳電影LOL

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！