雅虎香港新聞 【萬千星輝2020】最近10年視后下落 只剩李佳芯唐詩穎留TVB 其餘去晒邊？
今個星期日舉行嘅【萬千星輝頒獎典禮2020】，除咗觀眾想知獎項花落誰家，有份角逐嘅藝人更加肉緊，畢竟有獎項加持身價都會水漲船高！翻查資料，過去十年嘅視后，得獎之後都先後出去搵食，留低嘅反而冇咁多路數。
2010年 － 鄧萃雯《巾幗梟雄之義海豪情》
當年鄧萃雯以「九姑娘」成為首位「冧莊」視后，一吐《金枝慾孽》大熱倒灶輸俾黎姿嘅烏氣，後來拍埋萬眾期待但收視唔得嘅《金枝慾孽貳》後走人。當年有傳雯女過檔HKTV，實情係北上發展，近幾年又回歸香港，拍過ViuTV嘅《婚內情》。2018年TVB開拍《多功能老婆》原意搵雯女做女主角，後來變成楊千嬅主演，但雯女強調冇推過《多》劇。
2011年 － 胡杏兒《萬凰之王》
喺TVB年代非常搏命嘅杏兒，得獎後留喺TVB 到2015年就離巢，之後轉簽蕭定一，完約繼續北上搵食。不過同一時間杏兒結婚做埋媽媽，所以內地劇作品唔算多，反而最近參與真人騷《演員請就位》第2季成為「年度最佳演員」更多人知。
2012年 － 楊茜堯（楊怡）《名媛望族》
同杏兒同一梯隊嘅楊茜堯，亦都係喺得獎後4年唔再續約，而且都係結婚嫁人兼北上發展。嗰期嘅楊茜堯參與過舞台劇演出，轉個頭就喺2017年返TVB拍《再創世紀》。上年4月楊茜堯誕下女兒小珍珠，並且同老公羅子溢（原名－羅仲謙）一齊改名，話咁快兩公婆就接拍中港合拍劇《家族榮耀》。
2013年 － 田蕊妮《巨輪》
呢次得獎奠定阿田一線花旦之位，之後嘅《鬼同你OT》反應更好，可以話係事業高峰。2018年為咗做唱片停拍劇一年，一直留喺TVB至上年年初，結束13年賓主關係。
2014年－佘詩曼《使徒行者》
劇中釘姐三個阿媽同時逝世，阿佘嘅演繹堪稱一絕，拎視后絕對值得。近年由TVB轉為北上掘金藝人當中，阿佘係發展得比較好嘅一位，拍過嘅內地劇《延禧攻略》、《燕雲台》都係「流量大劇」，有傳已經身家過億，掂！
2015／2016年 － 胡定欣《鬼同你OT》 ／ 《城寨英雄》
第二位「冧莊」視后，拎完獎之後明顯放慢腳步，差唔多只係一年一劇。期間有向外闖，拍過電影《逆流大叔》。上年年底宣布改簽邵氏，同無線改為部頭合作，將會拍《白色強人II》。
2017年 － 唐詩詠《不懂撒嬌的女人》
其中一位仍然留喺TVB嘅視后，但係運水麻麻，2018／19兩年四部劇出街都反應平平，原本舊年上嘅《唐人街》直情被抽起，搞到成年冇見過唐詩詠！唯有寄望今年3套劇全數出街谷起人氣。
2018年 － 李佳芯《BB來了》
本來冇人睇好嘅《BB來了》因為劇情貼地而引起共鳴，劇集出街令Ali成為媽媽界人物。不過後來因為就政治事件表態而被雪藏，近期先「溶雪」 ，近作《愛美麗狂想曲》被安排網上播放試水溫。
2019年 － 惠英紅《鐵探》
小紅姐查實拍過大量TVB劇，只係重返影壇打滾一輪再拎埋3個影后獎座之後，2019年重返TVB拍《鐵探》連視后都俾佢拎埋。上年主力拍內地劇，今年有望出街嘅《刑偵日記》小紅姐演精神分裂患者，值得期待。
按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！
