香港8大開心果甜品推介！超翠綠開心果糊、開心果布甸包

開心果作為低熱量嘅堅果，一向都有唔少愛好者。通常喺Gelato店或西式甜品店比較容易見到佢嘅蹤影，而家仲愈嚟多餐廳或餅店推出開心果口味嘅甜品～今次介紹8間畀大家，包括懷舊甜品開心果糊、開心果布甸包及開心果芝士蛋糕，開心果控要收藏好，逐間去試！

開心果布甸包 珍多美

超火紅嘅法式布甸包，呢間餅店最近新推開心果口味，一推出就大受歡迎。開心果內餡好幼滑，好creamy同nutty，味道好香濃，切開仲有半流心效果。想再好食啲建議大家返屋企焗熱佢嚟食，外層法包會更香脆，一入口外脆內流心，係享受呀。

開心果芝士蛋糕 家後

估唔到餃子店都有甜品食？呢間主打手工餃子嘅麵店，甜品由店主嘅日本太太主理，主打自家製原味及開心果味芝士蛋糕。開心果味芝士蛋糕質感好軟滑，除咗濃濃嘅芝士味，開心果味都好突出，兩者加埋好有層次，而且比起原味無咁易膩，食晒成件都無問題。

土耳其開心果千層酥 Lonely Paisley 

呢款土耳其特色甜品叫Baklava，唔係周圍有得食㗎～上層係好多層嘅酥皮，中間係滿滿嘅開心果碎，而底層係糖漿製成嘅餅底。一啖咬落去有多重口感，酥皮超香脆。因為正宗嘅土耳其開心果千層酥甜度好高，香港人未必接受到，所以店主有減低甜度配合大家口味，呢款甜品配茶食就最啱喇～

開心果青檸奶油芒果千層酥 Med Chef

千層酥最重要梗係個酥皮，餐廳選用嘅皮特別薄身，主廚同樣用土耳其式製法，令到酥皮焗起會特別香脆又有空氣感。平時食甜品如果多cream會好漏，呢款甜品喺打發奶油時加入白朱古力及青檸，濃香之餘味道又多層次，重點係清新咗好多。

開心果達克瓦茲 Lovever Patisserie

法式甜品唔只得馬卡龍，仲有呢款同樣外脆內軟嘅達克瓦茲，無咁甜又有杏仁香。每月推出10款唔同口味，開心果係其中一款可能會有嘅選擇，開心果奶油霜加上開心果碎雙倍香氣。如果買唔到達克瓦茲，亦可以試開心果脆殼瑪德蓮，外層有粒粒開心果碎，味道香濃。

開心果切餅 多美意餅屋

位於佐敦港鐵站附近嘅街坊餅店，定價親民但有酒店水準。最出名嘅就係切餅，特別係開心果口味，綠色嘅開心果慕斯味道自然又夠突出，加上忌廉、開心果碎、海棉蛋糕、朱古力脆脆同餅乾低，食得出唔同口感層次，甜而不膩。

超翠綠開心果糊 蘭苑饎館

位於太子嘅老字號中式糖水店，主打平時超少見嘅開心果糊！開心果糊顏色超翠綠，唔了解嘅人可能以為加咗色素，但咁綠其實係因為選用伊朗出品嘅開心果，味道自然唔會太甜，帶淡淡開心果香氣，好濃稠但食完唔會覺得heavy。另外仲有供應開心果糕，味道比開心果糊甜少少，有機會真係要嚟試下～

開心果Maritozzo  SAKImoto bakery 嵜本 高級Shokupan專門店

Maritozzo係一款嚟自意大利嘅甜品，呢間大阪過江龍高級Shokupan專門店就用自家中種同湯種製法而成嘅極生麵包製作，裡面係法國鮮忌廉。士多啤梨同開心果口味都好受歡迎，柔軟鮮忌廉同香脆嘅開心果形成對比，口感輕盈唔會太膩。品牌亦有出開心果果醬，堂食配麵包得，成樽買走亦得。

文: Yanica

編：Kar