馮素波主演短片《垃圾》獲法國影展最佳女演員獎 隱瞞膝傷頂硬上斜路推梳化︳電影LOL

喺電視台工作多年嘅波姐馮素波，近年喺社交平台頗為活躍，日前佢喺個人專頁公布喜訊 － 佢主演由麥婉欣執導嘅短片《垃圾》，獲得法國康城世界影展(World Film Festival in Cannes)最佳銀髮影片、最佳人道主義影片仲最佳女演員（短片）三項大獎！

法國康城世界影展並唔係下周開鑼嘅康城影展，波姐都有同大家解釋「雖然這不是你們經常聽說的那種大影展，但我們的作品能受到關注，我還是覺得好開心榮幸啊」。即使入行多年，馮素波對於得獎依然感到高興。「這個最佳女演員獎，對於我這個八十歲的老太太來說，真的是意義非凡，心裡充滿了感激」。

《垃圾》係以虐老為題材嘅短片，片中波姐被兒子（林耀聲飾）心理及肉體上虐待，其中一場戲要被個仔打到跌倒，波姐就自己設計動作以防受傷；另一場戲波姐同戲中演街坊嘅葛民輝一齊將大梳化推上斜路，波姐有膝傷但冇話畀導演知，專業精神令人敬佩！《垃圾》嘅監製本來打算向波姐宣布喜訊同時送上獎座，但因為運送時間不合，唯有等到6月中首映先至「頒獎」。

童星入行嘅馮素波，父親係60年代粵語片導演及演員馮峰，而弟妹之中最為人認識嘅應該係九妹馮寶寶，而另一位弟弟馮克安曾經喺香港影圈做過動作演員及武指。波姐6歲時拍攝首部電影《細路祥》，因而同片中另一童星李小龍結緣，後來雙方失去聯絡，到長大後先至喺聚會中重遇。

更多電影文章

電影LOL 今期睇咩戲︳九龍城寨．圍城／從今以後／犯罪都市：鐵拳清算／挑戰者／劇場版 GIVEN 被贈與的未來 -柊MIX-

英國演員Bernard Hill逝世享年79歲 曾演《鐵達尼號》船長遇難一幕最動容︳電影LOL

The Rock醜聞連環爆！拍新片用樽裝小便 傳推無料打雜舅仔做CEO︳電影LOL

電影LOL︳19歲哈佛華裔男生Wesley Wang自製短片一炮而紅 升呢做荷里活編劇導演

電影LOL︳李安成名作《囍宴》翻拍 陳沖尹汝貞Lily Gladstone三大女星參演

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！