黃建東大晒與利愛安合照 「東涌羅浩楷」新髮型被指似朱千雪

今年嘅港姐選舉同埋亞姐選舉都有矚目嘅佳麗，佢哋嘅樣貌唔係最標青，不過就憑住獨特樣貌和氣質突圍而出，備受網民關注，而佢哋就係有「佛祖」及「東涌羅浩楷」之稱嘅利愛安（Kirsten）及「黃花閨女」薛影儀。雖然佢哋都喺首輪面試止步，不過都被公司睇中，人氣急升嘅阿儀隨即與亞視簽約，成為旗下藝人不足兩星期已經密密接job，仲好有信心做「亞視一姐」，而利愛安喺早前亦成功與無綫簽約做藝人，兼火速加入《愛·回家之開心速遞》劇組開工。

早前黃建東（Derek）已經喺IG大晒與Kirsten嘅合照，去到前日Derek再度上載與Kirsten嘅合照，並留言話：「喺 canteen見到阿安， 佢 straighten咗啲 hair即刻 chic咗， 無晒啲 Buddha味~雖然我生日過咗個幾禮拜， 但佢一見到我就即刻俾咗個 birthday hug 同 wishes我， such a sweet sweetheart~阿安，你加油呀， 我睇好你㗎！」相中嘅Kirsten唔再係攣頭髮，而係留有一把清新又斯文嘅長直髮。唔少網民睇到Kirsten嘅新髮型後，紛紛留言大讚好睇，例如「把長髮拉直了。變得漂亮多了」、、「這髮型漂亮多了 很適合你」、「咁打扮真係靚左超多」、「其實佢幾甜」及「其實佢只係面試嗰個look出現咗啲狀況，依家咁睇唔太差喎！」等等。另外，更有網民留言指Kirsten直頭髮個樣似朱千雪。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！