《中年好聲音2》醫學博士徐澤昌為追歌手夢參賽 健碩身形冧爆李佳
TVB歌唱真人騷《中年好聲音》吸引一班唱功一流嘅隱世中年參賽者參加,節目播出後好評如潮,馬上乘勝追擊開拍第二季。日前《中年好聲音2》舉行海選,除咗吸引唔少素人参加之外,仲有唔少藝人及熟悉嘅面孔參加,當中包括經常喺唔同節目出現嘅中醫師徐澤昌博士。
現年38歲嘅徐澤昌博士出身於中醫世家,操得一身fit到漏健碩身形嘅佢除咗具有醫學博士之外,仲擁有針灸學碩士及健身教練資格。徐澤昌對中醫學有深入嘅研究,而佢亦擅長將中醫學融入現代生活,所以佢經常接受各大媒體嘅訪問及喺不同嘅機構進行講座,與大眾分享中醫養生知識。唔少網民見到徐澤昌參加都表示非常驚喜,估唔到佢都有一個歌手夢。
喺海選面試中,徐澤昌以一身清爽嘅白色POLO衫配灰色牛仔褲示人,服裝將佢健碩身形表露無遺,尤其係佢嘅手臂肌肉,真係睇到一班網民心心眼!徐澤昌選擇唱出黎明嘅《夏日傾情》,當時佢表現淡定,不時露出輕鬆嘅笑容,投入地唱歌。表演完畢後,評判張添佳仲問隔離李佳冧唔冧,之後李佳就回答話:「冧呀!好冧呀!」另外,一班網民都睇得好投入,仲大讚佢好好。唔知徐澤昌博士有冇機會入圍呢?
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!