《婚後事》插曲｜《傾城》原唱許美靜南京個唱只唱半個鐘 觀眾叫回水 官方介入調查

早前劇集《婚後事》起用新加坡歌手許美靜原唱嘅《傾城》做插曲。許美靜呢位90年代到港發展大受歡迎嘅女歌手，近年重返大舞台，早前更到南京舉行「見面音樂會」，最高票價去到1,280元人民幣，拍得住香港紅館show頂級票價。但有觀眾表示，整個演出許美靜只係唱咗半個鐘，成個show大部份時間係同歌迷傾偈互動，甚至將部份經典歌由樂隊代唱，引發觀眾不滿，紛紛要求退票。

但根據報導，有觀眾投訴過後，許美靜嘅經理人唔肯回水之餘，更加話要求退款係「發夢」。據知，負責演出事宜嘅南京文旅局已經展開調查，而許美靜將於下月喺武漢舉行另一場「見面音樂會」。

今年49歲嘅許美靜，1994年推出首張國語專輯出道，其後喺台灣走紅，成名作有《遺憾》、《鐵窗》及《城裡的月光》等。1997年許美靜喺香港推出精選輯《靜聽精彩13首》，銷量超過20萬張，碟內2首粵語主打歌《明知故犯》及《傾城》都大受歡迎。但許於2000年推出國語專輯後神隱，當時有傳佢精神受困擾，而且被指同音樂監製陳佳明傳出緋聞。

之後許美靜間中參與音樂演出，2019年有歌迷發現許流落新加坡鬧市街頭，更貼出大字報控訴家人。後來許美靜喺公開場合承認，自己患上精神分裂症，並透露喺醫院時感覺以為會離開人世。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！