《萬千星輝賀台慶》今晚舉行 重溫10個台慶經典時刻

一年一度嘅TVB盛事《萬千星輝賀台慶》將於今晚（19號）隆重舉行，今年除咗有全台藝員施展渾身解數落力去表演各項環節之外，亦有草蜢、李克勤、陳柏宇、馮允謙、李幸倪、鄭欣宜等靚聲歌手擔任表演嘉賓。曾幾何時《萬千星輝賀台慶》係香港人必睇嘅重量級大型節目，唔知大家仲記唔記得以下嘅台慶經典時刻呢？

肥姐踩雞蛋
噸位十足嘅「肥姐」沈殿霞喺1987年台慶身穿鮮紅色運動裝，慢慢踩上由幾百隻雞蛋搭成嘅樓梯，簡直係一步一驚心。肥姐仲要喺雞蛋上扭呼拉圈，結果順利完成表演，真係睇到大家都緊張埋一份呀！

汪阿姐唱跳《熱咖啡》
如果要數《萬千星輝賀台慶》經典時刻嘅話，點可以唔提汪明荃呢？當年47歲嘅汪阿姐身穿黑色喱士性感打扮登場，率領古天樂、張智霖及鄭伊健等28位男歌手及男藝員，唱跳首本名曲《熱咖啡》。

吳剛師傅亡命表演吞火食炭
吳剛師傅除咗係《歡樂滿東華》常客，佢亦曾有為台慶表演吞炭同埋飲滾油，當年嘅表演真係好精彩，睇到觀眾目定口呆。

盧海鵬蒙眼跳火圈
盧海鵬（鵬哥）喺1981年台慶中，穿過幾個木圈後，被眾人受騙要蒙住眼過幾個木圈。但喺佢助跑時就將木圈點火，要佢蒙住眼跳火圈，最終會成功完成呢個驚險表演。

梁朝偉出牙力拉小型貨車
憑電影《尚氣與十環幫傳奇》進軍荷里活嘅梁朝偉，喺1987年台慶用牙力拉動載有藝員（貨車頂仲企咗工作人員）嘅200斤重小型貨車，真係睇到戥佢棚牙辛苦呀！

周星馳吳孟達施展「隔山打牛」絕技
喺1991年嘅台慶，周星馳就聯同吳孟達表演賭聖嘅「隔山打牛」絕技，當時除咗佢自己都笑場之外，連六叔都笑咗出聲。

楊盼盼單車行鋼線
1981年嘅台慶「楊門女將」楊盼盼連同鄭少秋一齊表演高難度嘅「單車行鋼線」，期間仲一度出小意外，需要靠何守信用竹竿撐着去完成動作，真係睇到大家手心冒汗呀！

曾志偉反串扮肥姐
曾志偉喺年初回巢，9月再獲升職做無綫總經理（節目內容營運）。當年佢都有一班男星犧牲色相，反串組成《男色魅影歌舞團》演出歌舞，而曾志偉就自薦扮演因病缺席嘅肥姐，睇到觀眾捧腹大笑。

「福祿壽」爆紅
王祖藍、阮兆祥、李思捷組成「福祿壽」喺2007年扮演中港台巨星，阮兆祥扮演顏福偉及Rain、王祖藍扮演甄妮及蔡依林，而李思捷就扮演黃凱芹及郭富城，佢哋都扮演得維肖維妙，睇到現場藝員、嘉賓及家庭觀眾拍爛手掌，人氣急升。

王祖藍向李亞男求婚
無綫首席創意官王祖藍喺2014年台慶表演魔術時假扮失誤，然後突然捧住紅玫瑰及巨鑽跪地向李亞男求婚，女方即場喊著答應，場面非常感人。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！