「亞視一姐」薛影儀個人單曲清明節上架 網民大讚MV造型：準備炸爆香港樂壇

現年38歲嘅「亞視一姐」薛影儀（阿儀），喺上年獲加薪轉簽亞視子公司AMM亞洲心動娛樂(Asia Momentum Media)，除咗繼續做「亞視一姐」之外，仲有機會到大馬發展。日前佢喺IG宣布個人單曲將於清明節（4月5日）上架，並上載8秒MV預告，去到今日佢再喺IG公開MV Teaser。

阿儀早前已經灌錄由自己創作嘅首支個人單曲，並透露於大馬拍攝MV。上星期阿儀上載MV 預告並留言話：「齊齊倒數 4月5號 #一加一等於阿儀 #薛影儀首支個人單曲」，喺預告中首先見到阿儀嘅側面剪影，並數白欖形式讀出：「7、8、9、10、11、12…阿儀」，之後穿上粉紅色毛毛衫嘅阿儀就好有台型咁出場，並轉咗一個圈。

今日阿儀再喺IG公開MV Teaser，並留言：「有啲緊張首歌準備要出街啦！ 4月5日 中午12時正 #一加一等於阿儀 #薛影儀首支個人單曲」，阿儀喺MV中有多個造型，更有舞蹈員伴舞，盡顯一姐風範。唔少網民睇完MV Teaser後，紛紛留言大讚：「推上叱咤金獎！」、「港版Jennie」、「2023最佳女新人 + rap star啊儀」、「好期待」、「生最期待嘅清明節，沒有之一」、「呀儀好西利 個mv 好靚」、「好正！勁過Madonna, 型過Lady Gaga」、「呀儀，你靚咗好多」、「阿儀準備炸爆香港樂壇喇」及「阿儀好靚 女神」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！