「古天樂唯一認愛女友」罕有露面 黃𨥈瑩保養得宜依然省鏡

黃𨥈瑩曾與古天樂拍拖7年，亦係古天樂唯一認愛嘅舊情人，雖然已退出演藝圈，但其一舉一動仍獲關注。黃𨥈瑩息影並轉職美容行業後生活極低調，僅間中出席圈中好友嘅聚會。日前，婚後定居溫哥華嘅袁彩雲，與囡囡及老公回港探親朋好友，而黃𨥈瑩就與陳敏之、車婉婉、向海嵐、唐文龍及王賢誌等人出席飯聚。

陳敏之喺社交網站分享聚會照，並寫上：「十幾二十年的友誼，昨晚因為彩雲回來，大家可以一齊重聚，仲好難得有下場，一起夜蒲，大家都好開心！希望大家保持年青，多啲再聚！#老朋友#識於微時#無所不談#笑到肚痛#寶刀未老」。喺合照中，黃𨥈瑩頭戴杏色Cap帽，穿上黑色衫和粉紅色西裝褸，雖然望落有少少發福，但整體狀態依舊相當好，如同食咗防腐劑一樣，非常省鏡，所以唔少網民都留言大讚佢保養得宜。

黃𨥈瑩獲選1994年最上鏡小姐後簽約TVB入行，首套參演劇集為《餐餐有宋家》，與古天樂飾演盧宛茵嘅兒女「宋富」和「宋貴」，二人亦因此劇日久生情擦出愛火花，有指黃紀瑩與古天樂拍拖期間減產，直至分手後再活躍幕前，2011年拍完《On Call 36小時》就約滿離巢。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！