「尊夫人」宋芝齡代表自由黨參選區議會 黨主席親回安德尊會否助選

TVB午間節目《流行都市》主持宋芝齡除咗幕前工作以外，生意瓣數亦多不勝數，近年宋芝齡仲投身埋政界，出任自由黨灣仔支部主席，早排更參加地區派米活動。8月時宋芝齡話暫時唔會參選住，視乎市民反應，睇下接唔接受。

不過事隔未夠2個月，自由黨舉行記者會公布年底區議會選舉，將會有7名成員參與角逐，當中就包括「尊夫人」宋芝齡，佢會喺正進地區工作嘅灣仔選區出選。宋芝齡同安德尊（大王）嘅「齡尊CP」疑幻疑真，甚至早前為拍節目而拜堂，難怪記者會嘅港聞行家都不禁問「安德尊會唔會助選」。而自由黨主席邵家輝就回應話「歡迎一路留意每位候選人動態」。話晒街坊咁buy呢對「璧人」，相信遲下喺灣仔有機會見到大王！

今次係新制度下首次區選，宋芝齡係中韓混血兒（媽媽係韓國人），幼年時喺韓國居住，有記者問宋芝齡認為自己係香港人定韓國人。宋芝齡當然有備而來，話自己係「持有三粒星香港身分證嘅香港人」，「有特區護照，從來冇韓國護照」，原因？「因為要交稅」，識答！

早前宋芝齡同大王為《流行都市》其中一個環節進行拍攝，演老爺嘅同事叫芝齡同大王「記住日日夜夜都要密密做，同安家添丁」。「新抱」參選，會唔會影響「造人」大計？

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！