「御用細佬」變「御用大佬」 入TVB整電話被賞識 黃嘉樂多得女友學識笑面迎人

44歲嘅TVB藝人黃嘉樂宣布求婚成功，同拍拖5年女友Samantha拉埋天窗，仲晒出早前影嘅婚照。本身係婚禮攝影師嘅Samantha冧爆留言話「影過幾百對新人嘅我比人影返先知咁辛苦」。

入行早期睇落溫文有禮、堪稱TVB「御用細佬」嘅嘉樂，曾經喺訪問直認脾氣臭影響星途，女友因工作關係成日笑容滿面，仲提醒嘉樂要保持笑容，咁先唔會俾人誤會。

的確黃嘉樂星途唔算順利，遲佢一屆藝訓班畢業嘅胡定欣已經做咗2次視后，嘉樂同男一位置仲有段距離。原來2011年時佢曾經北上發展，甚至演過中央電視台劇集《媽祖》，但係因為經理人公司傾片酬時「獅子開大口」影響發展，離港兩三年後好在被TVB召返嚟拍劇，仲順手簽埋經理人合約。

唔講唔覺入行20年嘅黃嘉樂，1997年本來考到加入海關，但因為父親強烈反對而作罷。後來嘉樂喺電話公司工作，有次入TVB電視城藝員科整電話，居然俾藝員科職員邀請考藝訓班。本來已經當面拒絕，但係後來嘉樂收到同一位職員打電話再次游說，佢認真考慮之後決定一試，並且順利被錄取。由於個樣太嫩，嘉樂演咗好多細佬角色，到近年嘗試留鬚變man，反而變成「御用大佬」，喺《果欄中的江湖大嫂》及《解決師》演黑道人物。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！