「細細粒」陳嘉佳直播突然爆喊 女助手唔安慰只顧帶貨 網民直斥無人性

有「細細粒」之稱嘅陳嘉佳（小寶）以TVB劇集《老表，你好嘢！》、《老表，你好Hea！》為人熟悉，2016年簽約由曾志偉、王祖藍合資經營嘅「手工藝創作」工作室後就長駐內地發展，主力喺抖音直播擔任「吃播」；最近細細粒就喺直播中失控爆喊，不過身旁女助手唔只無理會，更繼續向鏡頭舉起食物，此舉令網民大為反感。

36歲嘅細細粒擔任「吃播」，喺直播中向觀眾推薦美食「帶貨」，曾經挑戰大胃王去日本餐廳一個人食五人份量嘅食物，靠「吃播」食出名堂，直言自己每日都要直播7個鐘，由早上7時做到凌晨2時，做完直播仲要開會等等，仲話自己有時食到唔想食都要夾硬食；近日細細粒又再直播「帶貨」，點知細細粒突然諗起自己長期喺內地工作，加上疫情關係難與媽媽見面而情緒失控：「我以前在香港的時候，我經常會看到你們都說一年才能……都說一年才能回家一次，我從來都沒想過我會離開我媽那麼久。」

當細細粒轉身抹眼淚時，助手就只係舉住兩包急凍食物繼續帶貨，無畀到任何安慰；雖然細細粒之後平復返心情，仲識得安慰返自己：「真的是為了生活，來！沒關係咱們就打工嘛，沒關係咱們就好好努力。」但唔少網民都覺得助手無人性，眼中只有帶貨，紛紛留言：「旁邊都還在帶貨真是醉了，眼裡只有帶貨了」、「人家都哭了還拿兩包肉放在旁邊」、「旁邊女孩有點無情啊」等等，亦有網民建議細細粒努力工作，喺大灣區置業，接埋媽媽嚟內地一齊生活。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！