【《尋秦記》電影版】陶總管另有人選？ 歐瑞偉：根本冇聯絡我

《尋秦記》開拍電影版，古天樂日前出席影視博覽時，與幾位「舊情人」再見面，連秦始皇林峯都有出席，當日古天樂提到很難得可以再與電視版原班人馬合作，不過台上少了項少龍身邊的陶總管——歐瑞偉。

歐瑞偉今日於九龍灣出席活動，染了一頭灰白頭髮，造型酷似財政司司長陳茂波，他說除了《愛。回家》，又正為TVB劇拍新劇，故要keep住造型出席。講到《尋秦記》電影版，歐瑞偉透露原來沒有收過演出邀請：「根本冇聯絡過我，可能係拍呢一邊故事啦。」他又大感可惜：「都可惜㗎，不過隨緣啦，畢竟都係經典嘅製作，我都想參與，要顧及好多因素。」

另外，馬德鐘今日為活動擔任頒獎嘉賓，他承認成為視帝後多了商演活動參與。提到近況，馬德鐘表示近日影響了好友陳山聰食素，他說：「佢話見到我好似回咗春咁，山聰跟我食咗素一個月，覺得呢個飲食習慣好好，又可以影響到身邊嘅人。之前一班朋友有時出嚟聚會，就會佢有佢哋食，我有我食素，但而家影響到其他人，覺得好好。」山聰亦指：「係呀，我覺得佢真係回咗春，我就回緊。」

山聰接着說：「近幾個月食全素，之前玩gym食得太多肉，而家食素覺得OK。（喺香港食素會唔會覺得唔方便？）咁又唔係，其實都好普及，好多地方都有，食咗素之後覺得自己精神咗，磅數亦速跌，好快就跌咗8磅，自己照樣食飯、意粉等澱粉質食物，但冇食肉。」正在開劇的山聰表示，由於同劇演員姚子羚也是素食者，而且食素年資很長，所以今次轉為素食者後最大得着是姚子羚會煲素湯返去給他一起飲，而山聰的女朋友有時都會煲素菜湯，他們就可以互相分享。山聰覺得食素之後精神好好，現時每天都只是睡幾小時，就算戲裏面有動作打戲，自己都完全應付到，他和馬德鐘希望未來可以有合作，因為兩人對上一次都已經是10年前的事。