【交稅啦】教你點揀稅貸優惠 稅貸借幾多先最好？

踏入新一年，交稅死線殺到，假如你不幸地在長假期耗盡花紅，這時候就可能要向稅貸求助，咁究竟申請稅貸，叫價幾多才穩陣？

稅貸息率越低 還款責任越大

傳統智慧申請稅貸，重點係實際年利率（APR），你越借得多，實際年利率就越低，所以只要你收入有返咁上下，銀行都會建議你借稅貸越多越著數。

不過稅貸銀碼越大，意味你還款責任就越大。例如稅貸標榜可以借盡相當於你十倍月薪銀碼，試想像一下，即使除開24個月，你每月收入扣除還款應付生活都相當吃力。所以考慮借幾多，重點應該係自己每月還得起幾多，才有把握避免陷入以債養債困局。

如果你是目標為本用作交稅，最簡單方法就係申請與稅額相若的稅貸。這方法好處係借貸額夠保守，只要你有入息證明及稅單，銀行要批出稅貸應無難度。不過申請還款期就不宜長過一年，避免明年要交稅時你仍未搞掂稅貸舊債。當稅貸到手時，最好把兩期稅款一筆清，費事自己唔小心用盡支付二期稅款的稅貸儲備。

另一方法係以自己今年加人工數目為基準，例如你今年跳糟獲加人工五千，借稅貸六萬，加人工個數就剛好抵銷稅貸還款額。此方法好處係你可以繼續用加人工前收入作每月生活預算，而交稅後餘下的稅貸，亦可以作為儲備，讓自己有更大空間周轉。

還有一個基準係按卡數借稅貸，如果你稅款唔多，但就累積幾萬銀卡數未清，與其任由卡數與罰息不斷滾存，倒不如趁機會用低息稅貸取代高息卡數。此方法除了可以一筆清卡數，另一好處係迫自己有紀律地按月還債，撇甩拖數壞習慣。當然清掉卡數後，要切記避免再滾存卡數，避免自己要應付兩條還債戰線。

選擇稅貸優惠 未必要息率先決

每逢交稅季節，間間銀行都會推稅貸優惠，正路睇揀邊間銀行，應該係睇APR有幾低。不過你唔係借十幾廿萬「大戶」的話，APR其實分別有限，所以揀邊間銀行，應該睇自己行動力及「轉會」需要。

自問行動力極低的話，最好選擇出糧戶口銀行的稅貸，皆因可以在同一銀行戶口扣除還款，毋須每月提自己在還款死線前過數。如果你今年轉了新工，對現時幫襯的銀行服務又唔太滿意，就可以順便策動「轉會」，因為部分銀行稅貸優惠係針對開立新出糧戶口，所以利用「轉會」優勢就可以賺盡額外優惠。當然如果你趕住交稅的話，甚麼回贈、禮券小禮物都係其次，邊間銀行可以極速批出貸款就最實際了。