【京都師傅坐陣】主打傳統會席料理+廚師發辦 東京米芝蓮星級餐廳姐妹店進駐中環

·5 分鐘文章

迎接新一年想同班親朋好友食餐好嘅?中環最近就新開一間主打傳統會席料理嘅日式餐廳,每日從東京豐洲市場選購新鮮時令食材空運到港,炮製適合配搭酒品嘅精緻料理。亦可以喺日式舟屋為設計概念嘅屋形船當中享受廚師發辦料理。更設有藏酒豐富嘅酒庫,由日本清酒到威士忌都一應俱全。

以日式舟屋為設計靈感嘅屋形船,呼應返餐廳想打造漁港鬧中取靜氛圍嘅概念
以日式舟屋為設計靈感嘅屋形船,呼應返餐廳想打造漁港鬧中取靜氛圍嘅概念

月山係東京米芝蓮一星壽喜燒名店日山嘅姊妹店,佔地約3,000平方呎。由日山行政總廚黃冠華師傅主理廚師發辦料理,而嚟自京都、有超過50年經驗嘅日籍總廚細秀勝師傅就以會席料理為主。了解到中環係旅遊熱點,亦有多款擺盤走西日風格嘅單點菜式選擇。

「月山」會席料理($1,388/位)
「月山」會席料理($1,388/位)

會席料理從日本江戶時代嘅酒席發展而成,按順序送上各款料理。就咁睇好似同大家聽開嘅懷石料理幾似,華師傅就同我哋解釋,指兩者都係好重要嘅日本飲食文化,分別在懷石料理比較靜態、著重擺盤,會席料理相對熱鬧,而且著重料理嘅溫度,確保唔同食材都係以最合適嘅溫度奉上畀客人品嘗。

先付:梭子魚一夜干、柚子醬油漬筋子、水雲配梅子素麵
先付:梭子魚一夜干、柚子醬油漬筋子、水雲配梅子素麵

日本視單數為吉利數字,因此餐廳供應嘅會席料理亦會以九道菜或者11道菜為前提。先奉上嘅先付有自家梭子魚一夜干、柚子醬油漬筋子、水雲配梅子素麵,小巧精緻。

椀物:松葉蟹配鱈魚白子
椀物:松葉蟹配鱈魚白子

然後係味道柔和嘅椀物(湯品),選用冬季當造嘅白子,以清酒浸過去除腥味後,配搭鮮味十足嘅松葉蟹煮成,加上穴子乾及柚子皮點綴,鮮香暖胃。

向付:牡丹蝦、池魚、大拖羅
向付:牡丹蝦、池魚、大拖羅
煮物:北海道赤鮑配山椒肝醬
煮物:北海道赤鮑配山椒肝醬

三款向付(刺身)建議先從味道較淡嘅牡丹蝦開始食,最後品嘗脂香肥美嘅大拖羅。而煮物用北海道赤鮑先蒸煮,加上山椒肝醬提鮮,再配搭口感外脆內滑嘅京都蝦芋,口感層次豐富。

燒物:日山A5和牛西冷
燒物:日山A5和牛西冷

姊妹店日山標榜選用日本權威和牛供應商「日山肉舖」嘅和牛,而喺月山大家亦可以品嘗到日山A5和牛!燒物選用肉味濃郁、口感鮮嫩嘅西冷做炭燒。配搭京都冬筍同銀杏。

揚物:北海道柳葉魚、安納芋
揚物:北海道柳葉魚、安納芋

華師傅指揚物會以當季海鮮為主,例如拍攝呢款係以吉列做法炸嘅北海道柳葉魚,外脆內嫩。安納芋甜度較高、口感軟綿。

(前)酢物:醋漬九州北寄貝、(後)御食:九州雞湯素麵
(前)酢物:醋漬九州北寄貝、(後)御食:九州雞湯素麵

肉質爽脆嘅九州北寄貝以京都米味噌同醋腌漬,酸味柔和。唔好以為旁邊嘅菊花只係裝飾,其實係醋漬日本菊花同山形紫菊花,味道完全唔苦,口感偏爽而且會有清香。酢物減少前面料理嘅油膩感後,會奉上以飯或麵為主嘅御食作為收尾,例如呢碗素麵加上九州雞骨熬嘅雞湯,味道鮮甜。

甘味:北海道赤肉蜜瓜
甘味:北海道赤肉蜜瓜
銀嶺月山 純米大吟釀($1,380/720mL)
銀嶺月山 純米大吟釀($1,380/720mL)

會席料理以酒席為重,餐廳亦有駐店唎酒師,可以按客人喜好推介唔同嘅清酒。

汐.廚師發辦($1,888/位)
汐.廚師發辦($1,888/位)

華師傅憑多年經驗同對海鮮嘅熟悉程度,設計出有其獨特風格嘅廚師發辦料理。汐.廚師發辦包括兩款前菜、三款刺身、12件壽司、三款酒肴、一款熟食/卷物同甘味(甜點)。壽司選用新潟特A級魚沼米,米粒煙韌有彈性。

白蝦壽司、九州針魚壽司
白蝦壽司、九州針魚壽司

除咗選用當季新鮮食材之外,師傅亦花唔少心思喺搭配上面,例如冬季當造嘅九州針魚味道較為清淡,所以就加上魚子醬提鮮;北海道牡丹蝦會加上蝦頭炸成嘅蝦油,增添蝦香。

燒A5日山和牛西冷($538)
燒A5日山和牛西冷($538)

單點菜式當中亦見日山和牛!不過單點嘅版本會配上三款醬汁:麥粒味噌、山椒七味同乾蔥芝麻脆脆,各有唔同風味。麥粒味噌係以麥粒發酵而成、微甜而口感豐富,山椒七味微辣有辛香,乾蔥芝麻脆脆非常鬆脆香口。

雲丹海鮮刺身韃靼($248)
雲丹海鮮刺身韃靼($248)

色彩繽紛嘅刺身韃靼以三文魚、甜蝦、赤身製作而成,加上北海道海膽同波蘭卡地亞魚子醬。食前淋上以海膽蓉、生蛋黃、味啉等做成嘅海膽醬,鮮味濃郁。

黑鮑魚配山椒蛋黃醬($268)
黑鮑魚配山椒蛋黃醬($268)
 慢煮八爪魚配麥味噌($168)
慢煮八爪魚配麥味噌($168)
行政總廚黃冠華師傅
行政總廚黃冠華師傅
日籍總廚細秀勝師傅
日籍總廚細秀勝師傅

月山

地址:中環皇后大道中80號 H Queen's19樓

文:Cathy.H
相、片:Wilfred Chui

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能