【另一巧合？】《雙面伊人》以外 網民話《美味天王》一播出就有大事發生？

TVB年初安排喺深夜重播劇集時段，播放1999年推出、鄭伊健主演劇集《雙面伊人》。不過宣布之後，巧合地都因為李香琴、吳孟達同廖啟智逝世，要3度讓路俾向佢地致敬嘅劇集。唔知係咪費事又有變卦，結果TVB安排下星期喺《律政強人》播完之後，重播《法網伊人》並抽起《雙面伊人》。

除咗《雙面伊人》三度延期以及講足成30年嘅「丁蟹效應」之外，原來仲有另一套TVB劇，背後有一個都市傳聞……

1997年TVB30周年台慶劇《美味天王》，班底有齊歐陽震華、關詠荷、宣萱、古天樂、沈殿霞及秦沛三代主角級人馬，可能唔少觀眾都睇過幾次，但係有網民發現，《美》首播以至每次重播，香港都有大事發生。

網民話，劇集1997年11月首播時，香港爆發禽流感。1999年7月第一次喺下午重播，當時香港受颱風約克吹襲，令天文台懸掛16年來首次的十號颶風信號。到2003年3月第二次重播，香港爆發沙士。2005年1月第三次重播，董建華辭任行政長官。2020年1月第五次重播，香港爆發新冠肺炎。呢個講法聽落又真係幾多巧合喎……咪住！fact check下先！

1997年禽流感由當年8月發現第一宗人類感染個案開始，至12月底情況嚴重，港府宣布殺雞。《美》播出嘅時間的確係呢段期間，但唔算係「踏正」大爆發。同樣情況喺第2次重播出現，2003年3月重播時沙士已經喺香港出現社區傳播，所以都係件事出現咗先重播。

至於第一次重播時，颱風約克係1999年9月13日接近香港，9月16日天文台掛起十號風球，但係劇集9月6號就播完，錯晒！而2005年重播時董建華係3月中辭職，劇集2月8號就播完，最多你話當年2月中就傳出董建華辭職啦，都係錯喎。

唯獨稍為切合嘅可能係上年重播就遇著新冠肺炎爆發，當時劇集由1月8號播到2月5號，而1月下旬香港出現首宗確診個案。

正如財經界都分析過，「丁蟹效應」只係有一半機會喺秋官劇集播放時發生，所以呢啲都市傳聞，都係聽吓就算啦。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！