【咁似西門慶？】成龍扮鬼馬「神探蒲松齡」明年上映 《聊齋》作者係神探？

Um……

日本有福山雅治嘅《神探伽利略》。

鄰近經濟大國都有一套《神探蒲松齡》……

神探…蒲松齡…有網民奇道：套戲，講問米0架？

應該唔係。

標題都講咗，部戲由成龍主演，明年農曆新年2月5號大年初一上映。市場既然係大陸，又係賀歲檔上映，咁點會講鬼？點會問米？

《神探蒲松齡之蘭若仙蹤》由嚴嘉執導，劉曉光監製，屬古裝奇幻喜劇片，除由成龍外，仲有阮經天、鍾楚曦、林柏宏、林鵬、苑瓊丹，仲有曾參演《悍戰太平洋》、來自加拿大的中越混血三胞胎Luu Brothers。故事係講蒲松齡屢破奇案、收妖揚善過程中經歷一系列闔家歡奇幻故事。成龍形容自己係「一個是文縐縐的，一個很調皮，另一個捉妖的時候就很認真。」

本片改編自同名系列小說，根據豆瓣提供嘅資料，故事係講落難書生蒲松齡（成龍飾）執陰陽判化身神探，與捕快嚴飛（林柏宏飾）聯手追蹤金華鎮少女失蹤案。蒲松齡帶領「豬獅虎」、「屁屁」、「忘憂」、「千手」等一眾小妖深入案情，在找尋真相的過程中，牽扯出一段曠世奇戀……即係，唔講鬼，講妖精。沒有怪力亂神，但有妖精作祟。同《捉妖記》爭市場？

其實外間對故事真係講乜仍然不甚了了，但成龍嗰張最新海報呢，煞食囉！成龍以大文豪／書生look，手執陰陽判，以騰雲駕霧之勢，恣意翱翔……網民亦好快手咁幫佢整咗改圖，但惡搞改圖尺度比較……三級，片名都改埋。兒童非常不宜。

有冇興趣入場笑下？