【唔係癌症復發】主動澄清媽咪8月接受骨髓移植手術 黃芷晴：返咗屋企休養

蘋果動新聞
攝影：沈健程、廖達燊
攝影：沈健程、廖達燊

黃日華太太梁潔華喺2013年患上「急性骨髓性白血病」，經過化療後已康復，不過喺上月初有傳梁潔華舊病復發，黃日華停工照顧太太。不過黃日華事後話太太因指數回升，需要觀察，阿女黃芷晴就話媽咪係去覆診。

今日黃芷晴喺旺角出席活動，講到有傳媽咪血癌復發兼經常進出醫院，芷晴話媽媽身體冇大礙，強調只係返醫院定期覆診，佢主動話喺8月嗰陣，媽咪聽從醫生建議接受骨髓移植手術，佢話：「手術好成功，好多謝捐出骨髓嘅人，o依家媽咪已經返咗屋企休養，亦肥返啲啦。」

講到媽咪o依家嘅情況，芷晴話：「幾好呀，但係未來仲要有一段時間繼續觀察，睇吓有冇出現排斥，暫時見到冇乜嘢排斥，今次手術成功，令我同爸爸暫時放下心頭大石。」佢仲話：「之前有一年經常要出入醫院，爸爸係最辛苦，我有時要出活動同自己生意要搞，陪媽咪去醫院覆診都係爸爸，啱啱9月爸爸生日，同一日媽咪出院，直情係爸爸最好嘅生日禮物。」

雖然媽咪情況穩定令佢放心，不過芷晴自爆喺上月同男友分手：「相處咗兩年半，大家經常鬧交，拗嚟拗去，結果上個月分手，所以今年單身過聖誕，但係我唔心急拍拖，嚟緊聖誕仲可以多啲時間陪家人。」

黃芷晴喺旺角出席活動，講到媽咪病情，終於放下心頭大石。
黃芷晴喺旺角出席活動，講到媽咪病情，終於放下心頭大石。
佢話媽咪接受骨髓移植手術。
佢話媽咪接受骨髓移植手術。
黃芷晴仲自爆上月同男友分咗手。
黃芷晴仲自爆上月同男友分咗手。