【四大花旦歸位】張可頤郭可盈曾不和 黎姿做上市CEO吹雞鬥靚鬥凍齡

黎姿在07年棄影從商，接手弟弟黎嬰創立的醫學美容公司，星期一更由創業板轉主板掛牌，成為最靚上市公司CEO，昨晚更為公司舉行晚宴慶祝，當中她更請了好姊妹張可頤、郭可盈及蔡少芬出席，黎姿的友人更為四人合照，拍下這張「四大花旦」相。

從90年代開始，她們已經是TVB的當紅花旦，相隔多年聚首一堂，四人依然keep得好好，論年紀，49歲的郭可盈最大，之後是48歲的張可頤、47歲的黎姿，而蔡少芬就最細的45歲，不過四人都凍齡一流，保養得宜的美魔女，當中除了張可頤，其他三個已做了人妻及媽媽，黎姿更生了三個女兒。

回帶當年，四大花旦在TVB都有不少代表作，當中黎姿、蔡少芬及張可頤都拎過視后，只有郭可盈獲提名12次，但與獎項擦身而過，但她的《刑事偵緝檔案》系列的「啫時」Jessie一角，深入民心。此外，郭可盈於張可頤當年曾傳不和，於03年，張可頤以《九五至尊》呂四娘一角，踢走郭可盈奪得「我最喜愛的女主角」大獎，感言時指「恨」了拎獎多年，辣㷫不少花旦，之後可盈更明寸她攞獎經驗少兼冇品，加上二人同期出道，齊被力捧，早已視對方為競爭對手， 「唔妥」十年，今次二人由黎姿促成同枱食飯，應該將陳年不和之事忘記得一乾二淨。