【回顧2021.娛樂】盤點今年15位爆紅藝人 除咗Edan同Anson Lo仲有...

·8 分鐘文章
2021年爆紅藝人
2021年爆紅藝人

2021即將過去,今年娛樂圈可以話係百花齊放,當中有唔少藝人發展順利而人氣急升,深受觀眾及網民喜愛,好似有MIRROR成員呂爵安(Edan)、盧瀚霆(Anson Lo)、七仙羽及張天賦MC等等,今日就同大家睇下邊幾位藝人喺今年表現搶眼,成功上位,唔知大家又同唔同意呢?

呂爵安(Edan)
人氣男團MIRROR成員呂爵安(Edan)係隊中嘅音樂才子,今年加入單飛行列嘅佢成績非常亮眼,多首新歌都有唔錯嘅迴響,當中《E先生連環不幸事件》及《小諧星》分別成為今年YouTube十大熱門音樂影片嘅榜首及第三位。除咗音樂方面,佢喺綜藝節目、劇集、廣告等領域發展都十分理想,例如遊戲節目《考有Feel》、《膠戰S2》及BL劇集《大叔的愛》等等,搞笑「零偶包」形象深得網民喜愛。

呂爵安(Edan)
呂爵安(Edan)

盧瀚霆(Anson Lo)
人氣男團MIRROR成員「教主」盧瀚霆(Anson Lo)今年向多方面發展,除咗推出《EGO》、《MEGAHIT》等個人單曲之外,佢仲要參與劇集《大叔的愛》、《超感應學園》、節目《神的女主角》及電影《假冒女團》等工作,成績大豐收。佢同MIRROR成員代言廣告鋪天蓋地,遍佈大街小巷,人氣勢如破竹。另外,Anson Lo仲衝出香港,早前於韓國樂壇大型頒獎禮「Mnet Asia Music Awards」(MAMA )榮獲最佳亞洲新人獎(華語地區)。

盧瀚霆(Anson Lo)
盧瀚霆(Anson Lo)

Tyson Yoshi
獨立歌手Tyson Yoshi(程浚彥)喺9月聯同姜濤、Jer及林家謙舉行《拉闊音樂會2021 - 風火雷電》,憑獨特歌曲風格及爆肌身型,成功冧掂一班粉絲,人氣急升。具時尚感嘅佢亦獲得唔少品牌愛戴,邀請擔任代言人及出席公開活動,成為品牌新寵兒。

Tyson Yoshi
Tyson Yoshi

黃德斌
ViuTV劇集港版《大叔的愛》喺年中播出,搵嚟呂爵安(Edan)、盧瀚霆(Anson Lo)及黃德斌主演,中佬黃德斌喺劇中飾演地產公司分行經理「KK」,佢原本俾人嘅印象係又man又cool,不過今次佢喺劇中有破格演出,中途轉基戀上下屬阿田(Edan飾),經常擺出可愛及萌爆表情,驚喜程度爆晒分。劇中角色成功帶挈佢廣告一個接一個,人氣高企。

黃德斌
黃德斌

七仙羽
著名風水師「七師傅」七仙羽上年喺《鬼同你上位》憑無厘頭嘅主持方式、出位金句及「譚仔式廣東話」爆紅,今年佢主持嘅新節目《七救星》大受歡迎,令其人氣再推上高峰。瓣數多多嘅七師傅除咗係風水師,仲有做心靈教學、電視節目主持、小說作家及專欄作家等等,佢仲接廣告接到手軟,真係周圍都見到佢。

七仙羽
七仙羽

薛影儀(阿儀
今年港姐及亞姐選舉都有矚目嘅佳麗,佢哋唔係擁有最標青嘅樣貌,不過就憑住獨特樣貌和氣質突圍而出,亞姐代表就係17號佳麗「黃花閨女」薛影儀(阿儀)。喺面試後,阿儀瞬間爆紅,更有人喺網上更發起「阿儀不紅,天理不容」行動。雖然佢未能成功入圍,不過就獲得亞視高層賞識跳過選秀,簽約成為旗下藝人。人氣爆燈嘅阿儀一入行即被ATV力捧,工作就接踵而來,而佢嘅IG至今已經超過5萬人追蹤,被捧成新「亞視一姐」。

薛影儀(阿儀)
薛影儀(阿儀)

利愛安
講完亞姐代表,當然輪到港姐代表啦,而佢就係有「佛祖」及「東涌羅浩楷」之稱嘅利愛安(Kirsten),佢早前參選港姐面試入圍失敗,不過憑獨特氣質突圍而出,獲得網民高度關注。利愛安較早前亦成功與無綫簽約三年做藝人,火速加入《愛·回家之開心速遞》劇組開工,喺劇中飾演外傭姐姐。

利愛安
利愛安

郭嘉駿(193)
ERROR成員「三爺」193(郭嘉駿)喺年初接受傳媒訪問時,反擊曾志偉指ViuTV節目題材較偏門,只可以同J2比較:「做好自己就有人睇,收視得幾百部電視機,我哋不嬲都唔理…J2係​做咩?冇記錯係咪40幾歲仲話做《#後生仔傾吓偈》嗰個?」,呢番霸氣言論令佢被網民封為「娛樂圈清泉」,人氣爆升,連佢嘅金句「知我咩料啦」都成為網絡潮語。除此之外,由ERROR成員主持嘅《ERROR自肥企画》亦成網上熱話,播出時節目片段經常被網民喺網絡上洗版,而其首支個人單曲《睡到三點》反應亦不俗,已經突破170萬點擊人次。

郭嘉駿(193)
郭嘉駿(193)

邱彥筒(Marf)
ViuTV選秀真人騷《全民造星IV》自播出以嚟引起唔少話題,「人氣王」Marf(邱彥筒)唱歌跳舞樣樣皆精,成功彈起,吸引唔少觀眾及網民支持。總決賽亦喺聖誕夜圓滿舉行,Marf不負眾望以滿分40分姿態奪得冠軍,可以直接加入女團出道。Marf未正式出道已經獲得唔少品牌垂青,獲邀出席活動及拍攝宣傳照,身價急升兼成為廣告界新寵兒。

邱彥筒(Marf)
邱彥筒(Marf)

炎明熹(Gigi)
無綫歌唱選秀節目《聲夢傳奇》冠軍得主炎明熹(Gigi),喺比賽時有亮眼演出,獲得評判及網民讚賞,人氣急升。Gigi獲得冠軍後明顯備受力捧,工作量有增無減。喺音樂方面,Gigi除咗推出首支派台歌曲《真話的清高》之外,亦與姚焯菲(Chantel)、鍾柔美(Yumi)及詹天文(Windy)組成女團「After Class」出道,推出新歌《要為今日回憶》。另外,Gigi亦有商演及與星夢學員齊齊開演唱會及參演校園青春劇《青春本我》。

炎明熹(Gigi)
炎明熹(Gigi)

姚焯菲(Chantel)
姚焯菲(Chantel)喺《聲夢傳奇》憑甜美歌聲震撼全城,被封為「國民初戀」。Chantel喺獲得亞軍後,工作接踵而來。除咗10月尾推出首支個人單曲《原來談戀愛是這麼一回事》之外,亦係女團「After Class」成員。人氣高企嘅Chantel吸金力極強,深得廣告商喜愛。

姚焯菲(Chantel)
姚焯菲(Chantel)

張天賦MC
《全星造星II》亞軍張天賦(MC),上年年尾宣布加盟華納唱片,今年先後推出《Good Time》、《反對無效》、《記憶棉》及《時候不早》等派台歌,當中《記憶棉》成為兩台冠軍歌兼打入「叱咤樂壇我最喜愛的歌曲」最後5強與MIRROR三子及張敬軒硬撼。日前MC更加舉行入行首個音樂發佈會《Have A Good Time - Meet & Greet》,得到粉絲熱烈支持,一票難求。MC人氣鼎盛,絕對係今年最搶眼嘅樂壇新人之一。

張天賦MC
張天賦MC

陶大宇
元祖級「師奶殺手」陶大宇近年不時出席內地商演,經常以劉德華《倒轉地球》及《愛你一萬年》作表演歌曲,其唱腔及「水撥式」台風早前喺網絡掀起哄動,更引起唔少人爭相模仿。除咗令歌曲《倒轉地球》翻hit之外,陶大宇亦喺網上爆紅,獲網民推舉成為「叱咤樂壇我最喜愛的男歌手」。另外,佢仲喺今晚(30日)舉行只此一場嘅網上演唱會:《買轉地球陶大宇演唱會》,有興趣嘅朋友千祈唔好錯過喇!

陶大宇(影片截圖)
陶大宇(影片截圖)

MC $oHo & KidNey
「試當真」成員蘇致豪(豪哥)和許賢(腎仔)化身「MC $oHo & KidNey」殺入樂壇,今年先後推出歌曲《係咁先啦》、《跌嘢唔好搵》及《Black Mirror》喺網上大受歡迎,當中《係咁先啦》歌詞「走先啦 係咁先啦 下次再玩啦」洗腦度十足,成為新一代潮語。

MC $oHo & KidNey
MC $oHo & KidNey

王丹妮
傳記電影《梅艷芳》(Anita)喺上個月上映,由模特兒王丹妮(Louise)飾演梅艷芳一角,佢獲外界認同扮演梅姐神似而人氣急升。電影票房已破6000萬,令佢成為影壇新寵,獲得唔少廣告客戶垂青,早前仲同老公羅孝勇以夫妻檔出活動吸金。

王丹妮
王丹妮

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能