【坎坷過後有艇搭】曾患抑鬱被騙積蓄 陳松伶如今身家過億甜蜜幸福

正在熱播中嘅無綫劇集《福爾摩師奶》搵嚟陳松伶(松松)擔正做女主角，劇中佢飾演「爵士夫人」祖迪費查原本居住於半山大宅，不過老公為咗保命，將佢棄之不顧，所以佢被迫去油麻地居住。之後，佢仲化身成「女版福爾摩斯」查案，劇情越嚟越緊張，引起觀眾估邊個係真正嘅「開膛手」。鏡頭前嘅松松有自信、精明又不向外國勢力低頭，鏡頭後嘅佢其實試過喺童年時慘遭至親出賣、被好姊妹呃哂積蓄並趕佢出門口，搞到佢一無所有，差啲要瞓街。

跌落人生低谷嘅陳松伶更患上抑鬱症，更曾一度諗過自殺。2005年淡出香港娛樂圈後，松松開始到內地發展，喺拍內地劇集《血未冷》時遇上細佢八年嘅老公張鐸，陪伴佢走出抑鬱，無微不至咁照顧佢，最後佢地仲修成正果，2011年註冊結婚。今時今日松松除咗婚姻幸福之外，生活亦過得無憂，同十幾年前嘅佢相差好遠。

日前有傳媒影到陳松伶同一班親友食完午餐之後，佢就好開心咁去咗名店掃貨，除咗衫同鞋之外，佢仲買埋餐具，滿載而歸，掃咗兩大袋先離開。據講，松松早前喺北京豪宅區買咗新屋，最近仲新居入伙，可能係為新居添置餐具喎。

喺近年，松松除咗拍咗兩套無綫劇集之外，佢仲密密喺內地登台、巡演音樂劇及上綜藝節目，知名度日增，令佢嘅拍劇身價由每集12萬，上升至20萬，仲傳佢年賺千萬人仔。有錢都係買磚頭最穩陣，所以松松喺老公同埋前輩鄭明明嘅教路下，10年前已經開始喺內地買樓，至今喺香港同內地已經有多個物業。另外，佢喺2015年以2300萬同老公喺何文田買咗間豪宅，而家呢個單位已經升到3千幾萬。保守估計松松而家嘅身家已經過億，總算守得雲開見月明。