【好有愛】擔心停藥增復發機會 林淑敏：老公堅拒冒險生B

入行19年的林淑敏，近年因為《愛回家之開心速遞》「大小姐」而受到網民賞識，去年更在台慶頒獎禮獲頒最佳女配角，事實上林淑敏在00年加入無綫後，雖然不乏演出的機會，但只是不起眼的角色，收入只僅夠糊口。直到10年，林淑敏突然確診患上第2期乳癌！

林淑敏早前接受商台節目訪問，提到當年的抗癌經過，她說：「嗰陣個人很沉重，冇好似做戲嗰種崩潰，由檢查、通知到做手術，成個過程好快，只係3、4日內嘅事。」她還說：「本來醫生話『你可能唔使打化療』，但係最後唔單止要打化療，仲要打標靶藥，因為我嘅Cancer係最惡嗰種。因為我有信仰，我就祈禱，一邊祈禱我就一邊消化，最後我就覺得要將所有治療做盡，如果唔係就會後悔。」

林淑敏好感激老公當時沒有離棄自己：「嗰陣適逢係生育年齡，但係我有呢個病，唔可能生小朋友，即係意味我唔可以畀到佢一個健康嘅家庭，所以我真係好驚，但係老公知道我有病，日日都去街市買餸，煮飯畀我食，每日都有五餸一湯，直到我康復後，佢就決定要同我結婚。」婚後林淑敏本來有想過生B，不過遭老公反對：「好多生過乳癌嘅人，尤其係年輕嘅女人，生理週期係比較差，可能每28日都冇月經，不過我冇受影響，生理週期依然係正常，只係家族遺傳荷爾蒙過高，需要食抑制劑接受荷爾蒙治療，食咗5年之後，其實我可以選擇唔食然後生BB，但係佢擔心荷爾蒙起變化，增加復發機會而反對。」