【娶銀行之花】老婆鍾意你乜？爛gag王韋家雄：鍾意我靚囉！

53歲韋家雄今日小登科，迎娶比佢年輕近20歲嘅「銀行之花」女友鄧楚雅（Keynes）。早上接完新娘，稍事休息，晚上就要準備婚宴。一對新人筵開28圍，主題就係幸福快樂、開開心心。顏色方面，全場以粉紅、白、綠色嘅花卉裝飾，都係太太喜歡嘅顏色。

韋生韋太亦換上西服，韋家雄身穿粉藍色西裝、太太著上白色低胸婚紗，約於傍晚5點45左右見傳媒，兩人合巹交杯、切蛋糕，又錫鍚俾大家影相。合巹交杯時，韋家雄仲一飲而盡。笑言由太太話事嘅韋家雄話：「所以我今日都要著粉色。」太太大讚：「好好睇呀！」

問到今晚婚宴上會否上台致辭？韋家雄話會啦。唔怕今晚飲醉？「我頂得住嘅，不過都預咗會醉。我五個兄弟都好飲得，大家應該隊佢哋。」太太就話唔驚：「唔驚佢醉，我幫佢頂！」韋家雄聞言即大讚：「真係冇得頂。」

再問番今早接新娘有冇喊啦，韋家雄話冇，韋太就踢爆：「佢有眼濕濕呀！」韋家雄死撐：「秋天天氣乾，冇眼水。」韋太就話自己都熱淚盈眶，感動不已。婚後兩人會盡快度蜜月，因為太太喺外國有親人，都想盡快同佢哋食飯，先去泰國再去台灣，「因為太太鍾意食台灣嘢，我仲問佢可唔可以去柴灣，因為近啲。」

生B方面，韋家雄一邊話順其自然，一邊話想享受二人世界，「費事咁快搞到佢脹卜卜啦！」韋太笑住話：「我依家已經脹卜卜喇。」話有Planning，但未開始。再問佢喜歡太太乜嘢？「靚囉！我係一個最著重外表嘅人。」韋太笑佢：「你咁浮誇嘅？」

咁問韋太鍾意韋家雄啲乜？韋家雄搶答：「佢都係鍾意我靚囉！我太太都係一個著重外表嘅人。或者佢係見到我盡在不言中。」至於俾分數，太太話：「今朝就110分，依家就119分，會不斷飆升。」