【定係致敬《藍貓》】大陸版《優獸大都會》年底上畫 預告片感覺似曾相識?
迪士尼動畫電影《優獸大都會》(Zootopia)大受歡迎,仲拎埋第89屆奧斯卡最佳動畫,除咗動物造型嘅角色親民,粵語版仲有黃子華同容祖兒配音,卡士比起好多電影重。
成績咁優秀,自然成為咗「參考」對象啦……最近大陸就有套動畫電影宣傳緊,戲名叫《動物特工局》。睇番劇情介紹,《動物特工局》兩位主角由一隻貓一隻老鼠拯救世界,弱肉強食嘅關係,就令人聯想到《優獸大都會》女主角朱迪(兔仔)同阿力(狐狸)。
呢套《動物特工局》,由愛奇藝發行,早前公佈咗一條約分半鐘嘅宣傳片,暫定12.21喺大陸上畫。喺宣傳片入面,動物角色嘅毛髮質感等等,比起以往盛極一時嘅國產大作《藍貓》,作畫有好大進步,但每隻出現嘅動物,都有《優獸大都會》影子。
不過《優獸大都會》本身都有抄襲之嫌,上年美國有位編劇,就入稟告迪士尼抄橋,話早喺00年同09年已經向迪士尼提過相似嘅構思。(新聞連結:
)雖然迪士尼否認指控,但就反映咗大家都係將動物擬人,出到嚟效果相似又講得過去…咁唔知《動物特工局》入面有冇鍾意食蜂蜜嘅黃色熊仔呢?