【家人照顧周到】多次跌倒不良於行 工人扶實琴姐去做復健

87歲李香琴縱橫演藝圈幾十年，演過的角色多不勝數，較接近而又深刻的作品算是08年的《溏心風暴之家好月圓》，當中的金句「唔使驚，嫲嫲喺大廳」到現在都記憶猶新。不過琴姐於10年拍攝《公主嫁到》期間意外暈倒，雖然送院醫治後沒大礙，休息了幾日亦都可以復工，但健康隨之敲響警號，拍完套劇之後，琴姐就開始淡出娛樂圈。

老人家最怕就是跌倒，自從退休後就深居簡出的琴姐，曾傳出患有腦退化和高血壓，12年時先後三次在家跌倒，因骨裂要多次入院接受治療，但自始行動不便，需要定期做物理治療。

大約年半前，譚炳文就講過很久沒跟這位老拍檔見面，還說：「佢唔行得又唔走得，搵佢做咩？佢可能捱緊苦，費事搵佢。」不過沒多久就見黃夏蕙在社交網貼出去探望琴姐的照片，當時見琴姐一頭白髮，但精神不錯，而譚炳文女兒譚淑瑩都在場。

家人對琴姐照顧周到，安排兩個外籍女傭貼身照顧，司機接送定期去做物理治療。日前中午，《蘋果》記者在理工大學見到琴姐，當時司機正準備泊車，沒多久就見兩個女傭扶着行動不太靈活的琴姐落車，女傭分別在左右兩邊扶住琴姐，而男司機就去車尾箱拿助行架和輪椅，女傭扶着琴姐行出幾步，司機推出輪椅讓琴姐坐下。

戴住紅色cap帽、皮褸長褲波鞋的琴姐，面色不錯，亦比之前飽滿，只是行動有些許不便！之後見女傭推着坐在輪椅的琴姐去康復治療中心，在中心內等候時，見到工人細心照顧，又幫琴姐拉高衫的領口。據知琴姐因為跌倒而行動不便，要定期到康復中心做物理治療，每次大約做個半小時左右，狀況亦有好轉。