【廚師的尊嚴】烹飪節目失手唔想呃師奶 杜汶澤道歉：我一力承擔

杜汶澤今年喺網上非常活躍，事關佢年頭開咗個網台，內容多數都係惡搞抽水式諷刺時弊，加上阿澤把口及水準超班嘅後製，吸引咗唔少人睇，當中嘅煮食節目，又教煮嘢食又有女睇更有鬼馬剪片花水思整色整水，當然成為最受觀眾歡迎嘅節目之一啦。

不過噚晚嗰集就出咗事喇，基於消防條例，開放式廚房唔可以用明火嘅關係，阿澤喺節目上一路都係用緊電磁爐，相信有用過電爐嘅朋友都知道煮嘢食用電爐有時真係可以好濕滯，而阿澤每集都會「小」個爐更加成為捧場客最期待嘅畫面。

噚晚呢一集阿澤就教大家點樣整酒樓常見嘅肉絲炒麵，大家都知啦肉絲炒麵最緊要就係個麵底要煎到脆吖嘛！咁就出事喇，事關用阿澤呢個方法煮的話，以電爐嘅火力似乎就唔夠猛，結果搞到個麵黐晒底。

雖然節目上娛樂性仍然非常高，而畫面都冇出到個麵失敗嘅情況，不過有眼利嘅網民喺條片下面留言話：「其實個麵黐X晒底，成個麵都唔脆，不過Cut X 咗。」又有網民話：「失敗之作照出街。」

作為一個負責任嘅老闆，阿澤見到留言之後今朝即刻出Post道歉：「為了昨晚《為何深夜總是餓》的肉絲炒麵失手，昨為一個廚師，我有責任向大家道歉！從來不解釋失敗的原因，因為失敗就是失敗，我一力承擔。感謝大家的意見，我會深切檢討，務求繼續為大家提供低俗而又高質的烹飪節目。因為我不想淪為連焗嚿斧頭扒焗完都唔敢切開俾觀眾睇嘅師奶教煮餸呃錢電視節目主持人！九十度鞠躬！向大家說句對不起。」

溫馨回帶：
G.E.M.疑違例開放式廚房用明火：用嚟裝飾唔得咩？
https://bit.ly/2JpVIhV