【張繼聰唔好睇呀！】謝安琪除淨黑Bra 同古天樂喺浴室咀嘴

古天樂破天荒為麥浚龍同謝安琪嘅年度音樂企劃再踏樂壇，，早前古仔同謝安琪，就為兩人合唱新歌《（一個男人）一個女人和浴室》拍MV。

MV講述謝安琪飾演嘅浦銘心同飾演佢第二任丈夫藍定凌嘅古天樂，喺浴室入面相處嘅默契，謝安琪喺MV入面激罕大膽演出，上身除淨黑Bra，再同古天樂咀嘴。拍攝嗰陣，佢哋都投入咗浦銘心同藍定凌嘅角色，所以大家都無尷尬。

事後，謝安琪同古天樂都話兩個人相處，溝通係非常重要。已經係幸福人妻嘅謝安琪話：「兩個人一齊耐咗，一個動作已經知對方要乜。相處係需要時間，一齊耐咗自然有獨特嘅相處模式。假如兩個人都認定咗對方係另一半，有冇一紙約誓都唔再重要。」

古天樂就分享佢父母嘅默契：「默契唔係一刻嘅事，我喺屋企見到爸爸同媽媽睇電視，大家會好有默契咁轉台，一句嘢都唔駛講。」佢仲話現實生活中嘅自己，都唔太重視一紙婚書：「感情係兩個人嘅事，有冇婚書唔太重要。我鍾意盡在不言中嘅安靜，如果兩個人都多嘢講，要喺同一個空間揾話題有時都幾攰，不如俾多啲時間關心同了解對方。」

至於為MV擔任導演嘅麥浚龍，佢話因為拍電影《風林火山》識左古天樂，覺得佢嘅領悟力好高：「首歌出街嘅version，其實就係我想古仔咁唱，同佢以往嘅唱法好唔同，佢係飾演緊一個唔擅於唱歌、但默默配合緊太太嘅唱法。其實佢唱嗰陣感情好豐富，反而係我要㩒住佢，要佢做返藍定凌呢個角色。呢首合唱歌，我覺得好好，我好想多謝古天樂。」