【曹總失戀了】《開心速遞》呂慧儀張景淳「龔水CP」終於開花結果

無綫處境劇《愛·回家之開心速遞》除咗劇情輕鬆搞笑又溫馨，仲造就咗多對受歡迎CP，好似有大小姐與送水輝、Mandy與博士、安仔與Bonnie、熊尚善與潮偉及熊尚水與龔燁等等，佢哋嘅感情發展一直備受網民關注。當中由呂慧儀和同張景淳飾演嘅「龔水CP」，終於有突破性發展，佢哋噚晚正式成為情侶。

佢哋原本係歡喜冤家，一時玩曖味、一時鬥氣互寸，正當大家以為佢哋差唔多要一齊嘅時候，張景淳竟然突然離開劇組，令到唔少觀眾大叫失望。之後唔少網民喺網上召喚佢重返，而佢亦喺上年7月回歸劇組，與呂慧儀飾演嘅熊若水再續前緣。去到噚日適逢係白色情人節，劇集就講到一直暗戀熊若水嘅龔燁，因為自己冇將若水放喺第一位，而唔敢追佢。當佢知道若水鍾意華仔，龔燁咁啱有又華仔演唱會飛，所以約若水喺白色情人節再睇華仔演唱會，不過可惜龔燁突然有事去唔到。龔燁做完嘢之後，若水約佢出嚟見面，話有嘢同佢講。若水喺噴水池邊同龔燁講佢心中嘅感受，仲話唔會將龔燁放喺第一位，同埋話可以俾機會佢做佢嘅男朋友。龔燁聽完之後沈默咗一陣，之後佢哋就突然嚟情深嘅世紀一吻，仲話：「三個字，我願意」，場面非常甜蜜，龔燁熊若水正式成為情侶。

呂慧儀及張景淳都分別喺社交網站發文，呂慧儀留言：「龔水黨們久等了」；而張景淳就留言：「歷時一年零三個月，龔燁熊若水，正式成CP了。龔水黨、開心速遞黨仔們久等了。Phase3現在正式開始。也多謝今日雜誌也幫忙宣傳，太客氣了。當是娛樂看就ok。我們做什麼都是為角色為劇集故事為了一眾劇迷～龔水日常也是和fans們互動的紀錄。希望大家繼續支持，更多意想不到的精彩故事，現在才開始！」

對於「龔水cp」終於開花結果，唔少網民都表示支持，仲紛紛留言話：「恭喜龔生龔太❤️會繼續支持」、「終於見到你地一齊啦！好開心呀！😍😍」、「等到頸都長，終於等到❤️」、「finally…終於一齊啦~最期待嘅一刻~」、「好開心，等左咁耐，終於見到若水同龔燁響一齊，今晚呢集，我翻睇又翻睇，睇左幾次❤」、「開心，龔水開花喇💕」及「曹總要揾另一個同佢一齊唱 #鳳陽花鼓 😂😂😂」等等。

另外，戲內感情得意，但戲外感情失意嘅呂慧儀，喺上星期宣布與黃文迪喺2018年已離婚，敵不過七年之癢，日後會共同撫養仔仔Anton，消息一出令到唔少人都好震驚。噚日有報道指呂慧儀搵咗《愛·回家之開心速遞》「龔燁」張景淳同「安仔」周嘉洛療傷，呂慧儀同張景淳除咗有好多合照之外，佢哋因為工作朝夕相對嘅關係而變得老友鬼鬼，仲試過私下約會，約埋一齊去睇鄭伊健演唱會。早前張景淳更力撐呂慧儀，爆鬧傅嘉莉抽水博見報。而喺劇中飾演「安仔」嘅周嘉洛，亦同呂慧儀好老友，喺等埋位期間，呂慧儀大庭廣眾之下依偎喺周嘉洛背脊休息。唔知會唔會真係戲假情真？