【最新圖片】加拿大註冊先斬後奏 吳綺莉N次「唔講啦」拒談女兒結婚

吳綺莉同成龍生嘅19歲囡囡卓林，今日喺ig宣佈同31歲外籍女友Andi已經喺11月8日喺加拿大多倫多結咗婚。消息曝光後，大批傳媒喺吳綺莉大坑寓所外等候，吳綺莉原來一早已經外出，直至下午3點半，吳綺莉終於現身。

吳綺莉落車後，有記者恭喜佢，問到吳綺莉心情點，佢話：「聽日要開工呀。」問到個女結咗婚知唔知？吳綺反莉問：「講做嘢得唔得呀？」好明顯唔想講個女結婚嘅事。記者追問佢有乜睇法？吳綺莉淡淡然咁話：「冇乜睇法。」

日前卓林被讀者發現返咗香港，吳綺莉當時卓林有搵過佢，今日問到吳綺莉有冇見過Andi？吳綺莉話：「前日見過。」會唔會祝福佢哋？吳綺莉話：「每一個人都想自己做嘅嘢係好，點解唔祝福佢吖？」係咪事前已經知佢哋結婚？吳綺莉即刻落閘話：「唔講啦，唔講啦。」

係咪個女財困先返嚟？吳綺莉話唔答，而問到佢對同性婚姻點睇，佢話：「我自己有好多朋友都係同性婚姻，冇乜點睇。」問會唔會同個女慶祝，吳綺莉話等個女工作完咗先。咁現在算唔算接受咗Andi？佢話：「冇話接唔接受，每一個人做嘅嘢都係順其自然囉。」今次卓林係咪返嚟同佢交代結婚嘅事，又或者有其他事同佢講？佢話：「唔講啦。」擔唔擔心卓林同Andi結咗婚之後會分到自己身家？佢話：「唔講啦唔講啦。」

卓林今次返嚟會喺香港發展定會返加拿大？吳綺莉話：「大個女啦，大家有大家嘅工作，希望專注番我自己做嘢方面。」同個女關係有冇改善？吳綺莉話：「朋友囉。佢永遠都係我最好嘅朋友。上次我都講過，俾多啲時間我做我自己嘅嘢，都唔係一件壞事。」會唔會叫卓林返嚟一齊住？吳綺莉話：「順其自然啦，大人嚟㗎嘛，真係希望我自己喺我生活入面搵番多啲我自己嘅嘢。」問吳綺莉對Andi印象點，佢話唔講：「希望大家唔好再問啦，要講嘅講晒。嚇親我啲鄰居，陣間人哋要我搬㗎啦。」佢話想多啲時間做自己嘅嘢，例如開畫展、下月中出畫冊，聽日開劇：「希望多人搵我做嘢啦。」至於個女有冇同爸爸（成龍）交代事件，吳綺莉笑住話：「都話乜都唔講囉，o依家sell吳綺莉。」跟住就返上樓。吳綺莉今日全程笑笑口，似乎心情都OK。