【有情有義多人撐】 張彥博捱足13年終開騷 張致恆爆料：佢好鍾意用沙糖洗面

張彥博噚晚喺九展舉行音樂會，有張文慈、康華、陳明恩同老公、KellyJackie等捧場。開場前，現場播出張彥博童年到近期嘅生活照，跟住染咗粉紅色頭髮嘅張彥博現身，自彈自唱幾首歌之後，第一個嘉賓陳奐仁出場合唱《愛是懷疑》，之後同關心妍合唱福音歌，關心妍話：「睇住佢大，真係當佢細佬咁，記得當時喺後台認識佢，仲係赤子嘅成員，覺得呢個年青人好有火，好鍾意唱歌，經歷一段時間後做咗演員，佢喺TVB嘅日子好努力、好辛苦，不過我哋係基督徒，成日喺佈道會做見證時，都見佢辛苦返工之後都會出席。」

到第三位嘉賓張致恆(Steven)出場，二人合唱福音歌，Steven話識咗張彥博十幾年：「喺我最無助時，佢收留咗我5年，我好似一隻跳蚤。」張彥博笑言嗰時kenny(關智斌)知道都問點解會頂得順Steven，不過其實Steven份人幾好。Steven又趁張彥博落台後，爆料：「8、9年前，我喺阿博屋企住，佢好鍾意用砂糖洗面，話好用過磨沙。佢又從來唔剃鬚，逐條鬚掹，成日喺屋企着條孖煙囪對住我，但佢份人好重友情，試過我冇錢，唔知點解佢又知，靜雞雞塞咗幾嚿水喺我枕頭，不過到o依家我仲未還錢。」

張彥博又拎住結他落台搵人合唱，第一個係同生父合唱《分分鐘需要你》，第二個係陳瀅。之後到表演嘉賓劉佩玥(Moon)上台，唱出《上帝最已預備》前，Moon話：「好榮幸我喺首先知道(開騷)嘅人，我同佢係兩個性格好唔同嘅人，但都相信神，有次佢好唔開心，我就同佢講，我哋唔係要行得有幾快，而係揀一條最啱最適合嘅路去行，因為上帝早已預備。」

佢又同何廣沛、郭子豪、羅天宇戴住假髮扮組合F4，合唱完兩首歌之後，《跳躍生命線》主題曲《無畏的肩膊》響起，馬德鐘同Moon中途出場大合唱，唱完Moon即拉陳瀅上台自拍。而尾聲，唱出最後一首歌《團缺》時，張彥博哽咽話：「好開心，嫲嫲嚟睇我演唱會，佢都93歲。我知呢條路好難行，知道有呢個騷時好震憾，呢場賽跑點都要捱落去，我今日可以跑到嚟呢度，我喺單身家庭長大，好多謝我兩邊嘅父母。」

完騷後，張彥博受訪話等咗13年終於開騷，好感動，冇諗過有咁多朋友嚟撐場：「3個禮拜之內開得成呢個演唱會，真係好難嘅一件事，好多謝家人同嫲嫲嚟到，好感動，要珍惜眼前人。《圓缺》MV係嫲嫲做女主角，我好感動佢可以參與，將最好嘅畫面留畀我，後父後母、兩邊嘅父母都有嚟，佢哋買爆晒飛嚟撐場，從來冇過問過我同限制我嘅生活，同爸爸合唱好開心，佢係我彈結他嘅啟蒙老師。」而Moon就笑話：「佢係big boss，我特登着裙襯佢，我平時唔係咁着，係為咗佢個騷。」