【樓市明燈】麥包用「呼吸plan」買環海‧東岸「預咗要還！」

藝人麥長青「麥包」3年前用「呼吸plan」購入九建(034)「劏房之城」紅磡環海‧東岸一個低層一房單位，他接受訪問憶述當時：「我係第一批買家，因為有九成半按揭所以買，個時我有信心供到，但無錢俾首期，最終以約420幾萬買入一個單位供樓花。」

3年前他以逾420萬元購入實用310方呎的低層單位，他坦言，一按八成向銀行承造，另外向發展商借一成半二按，一成半二按有4年時間去還，「由day one預咗要4年內還一成半二按，預咗筆錢去還呢條數。又唔係供得貴，供好平啫！」

他續指：「二按首4年息率與分行同息㗎！」購入該單位，他稱：「網上啲人又話我，唓！你買啲咩呀。我就話你唔買咪唔買，我又無偷呃拐騙，自己真金白銀，afford得到。其實由父母個代，樓，都係難供，你唔供，咪無！」價單顯示，該二按貸款首48個月息率P減3.1厘（當時P為5.25厘），其後年利率為P加0.75厘，可分30年攤還，目前仍屬首48個月息率，保守估計月供1.5萬多元。

當年首置貸款買樓 最終蝕讓離場

多年來處於夾心階層，既申請不到公屋，又抽不到居屋，當年借政府首置貸款買村屋後，適逢97樓市暴瀉，最終在2002年蝕讓離場，「如果當日有能力供，而家都升返哂，最緊要有無能力供樓。」來到今天，樓市轉勢，「我無動搖，買樓為乜嘢先。我成日講，自用也好，第時俾仔女都好，諗下自己當日點解要買樓。如果諗住投機，唔係投資呀下，其實我而家有少少投機，我無資格投資，因為我係搵食階段，唔係唔駛擔心生活、唔係一炮過買或俾好多首期，收租都夠供樓個種。投機，博大市好唔好，同買舖大細，例如買咗大，嗌住唔好開細呀，無分別。其實我買個陣時，我答記者都係預咗供得起先至買，樓市無包生仔，世界會唔會打仗，你點知。下下計，無得搞架喎。」

「而家好多人話上唔到車。喂！好笑地，我買層咁細嘅樓你就鬧我，跟住你就鬧緊自己上唔到車，鬧緊無人幫，你自己都唔行第一步。我曾幾何時買樓唔係同父母，同外父外母借錢呀。再講，你話個市點死點死，你自用，無乜問題。你拿來炒，無得講。環海‧東岸，我負擔得起，我有2個細路，女都18歲，第時佢自己要搬出去住，都叫做有個竇。我係揸長線，好老實講，我自己無父母幫，大到而家，其實你要出來搵屋，係好吃力。唔係一定要幫啲子女，能夠做到幾多咪幾多囉！（有街坊已放盤出售？）賣就唔會，租唔租，理論上都會，但唔急，個區要租，好租嘅，不過一收樓，第一批放租，老實講，一定平租，尤其我唔係高層單位。」

目前舉家居於早年買入的鰂魚涌單位，早已有個竇，「我而家留（環海‧東岸）俾細路仔，其實即是自用咋嘛。我有兩個小朋友。第日佢哋唔會兩個都痴住我㗎嘛。你要計自己條數，唔好理大唔大市，其實大市唔關我地小市民事。大唔大市是關啲炒家嘅事。」

當日被指樓市明燈？他回應：「對唔住！證明我全部樓都升嘅！就算當年蝕讓的單位，如果有能力揸到而家都係升，只是當年人工唔高，小朋友又出世，供唔起，先至壯士斷臂。」他不諱言，目前買樓等於儲退休金，「而家買層樓，好彩供到尾，退休後仲有二、三十年，到時將層樓再按，你都夠錢過世，你而家買樓等於儲緊退休金咋嘛！」

記者︰陳家雄