【永不言休】入行45年不愛應酬識老細 方伊琪：我好似唔係好啱呢個圈

今年是方伊琪入行45周年，早前她在北角接受《蘋果》訪問，對於這段演藝生涯，她笑說：「其實如果連埋做替工，係唔止45年，不過你問我嘅話，時間都易過，眨吓眼就過咗，但係今時今日我成日都講，自己好似唔係好啱呢個娛樂圈，除咗鍾意唱歌之外，比較鍾意收埋自己。」

正如方伊琪所講，她似乎真的不太適合這個娛樂圈。翻查資料，關於她的報道寥寥可數，不過在零緋聞、零宣傳的情況下，仍然keep住拍劇、登台及開演唱會，即使在70年代百花齊放的娛樂圈，搵錢又或者發展機會全部垂手可得，但年紀輕輕的方伊琪卻選擇去結婚，婚後仍然長駐在夜總會唱歌，雖然面對各種各樣的誘惑，但未有受到動搖：「以前做長駐嘅時候，曾經有人叫我做小酒吧歌星、廁所歌星，因為以前唱嗰間夜總會係冇後台，我一唱完歌就匿去廁所等第二次出場，有人話『有冇搞錯，出面大把老細，同啲朋友應酬、傾吓偈有利是收，又有靚車坐，乜你唔恨咩？」我就話冇，真係唔恨喎！」

之不過見到同期出道的藝人發展比自己好，難免會有點妒忌，但方伊琪說：「冇㗎，有啲同期做咗天王巨星，我只會好開心去欣賞，冇話想妒忌人哋，我覺得自己已經好開心，樣樣都OK，唔想行到好高，但係最後係跌得越傷，平和咁做人就得。做人最緊要係樂天知命，食幾多、着幾多係整定，講真呀，你個肚食得幾多？瞓又瞓得幾多？咪又係嗰幾呎床？人哋着名牌衫，但係我又有靚衫着，又可以季季換，平平哋已經好OK，你成日叫我着好靚，周身名牌，我反而覺得係負累，好辛苦。我都係咁教個仔，唔一定要名牌跟身，舒服就可以。」她續說：「就算而家拍劇，有人叫我得閒行上藝員科，等啲人記得，我咪話『呢啲阿媽級唔使，就算點做都係做人阿媽」，或者有啲人覺得我冇大志，但係做乜要咁麻煩？做人匆匆幾10年，唔好畀咁多壓力自己，開心咪得。當然要睇吓你追求啲乜嘢，有啲人係要出好多力先搵到自己追求嘅嘢，但係我好好彩，有三餐溫飽，有個舒服嘅竇，心靈舒服就得。」

回望過去，細談這45年的難忘事，方伊琪想了一會才說：「頭15年係好忙，幾乎日日都要唱歌，得閒嗰陣就會去玩，真係好開心。中間嗰15年多咗時間放喺家庭生活，少咗唱歌，之後嗰15年就多咗拍劇，嗰個年代嘅藝人啱啱開始多元化發展，同時間兼顧好多嘢。不過咁耐以嚟最記得係兩件事，以前我係唱半夜12點半嘅第一個騷，因為我都怕人飲醉酒鬧事，所以唔會唱遲，要唱最早，我記得張國榮嗰陣係唱2點半嘅騷。有次我喺台上唱緊歌，突然有一個蠟燭台掟咗上嚟，嗰陣着住長裙，好彩差少少，冇掟中，如果唔係燒着嗰條裙，之後先知原來係一個飲醉酒嘅客人掟上台，呢件事係最唔開心嘅事。」她又說：「第二件係開心事，有一次去馬來西亞登台兩個禮拜，第一個禮拜係同費玉清同台，第二個禮拜同鄧麗君同台，真係開心到不得了！嗰陣我唱半個鐘，之後到鄧小姐唱，我一口氣唱咗6首鄧小姐嘅歌，咁嘅年紀仲有人叫唱歌，好開心。」

現階段對於方伊琪而言，只會追求健康：「一定係身體健康，有健康先有能力行出去睇吓呢個世界，如果冇健康，就算畀你唱兩首歌都唔得，我冇諗過退休呢個問題，有得做就做，有寄託個人先會開心啲，有活力啲。我自己都有鑽研術數，睇過啲師傅，佢話我會唱到70幾歲，年紀越大，行嘅運都OK，不過你問我，我覺得要keep住唱，如果唔唱就會退步，而家加緊唱多啲。」她更將人生比喻為太極圖案：「你見到個圖案有黑有白，最唔靚嘅黑色嗰邊有點白，最靚嗰邊白色都有點黑，做人亦都一樣，當然唔會永遠都有順境，總係有啲唔開心嘅事，任何人都會有煩惱，睇吓自己點拆解，只係睇吓你點去面對，如果你問我，做人最緊要平凡是福，開心是福，唔好將啲煩惱帶上床，人都靚啲。」

場地提供：新光戲院