【港式便當唔係頹飯】每日新鮮製作+素食選擇 鰂魚涌新開便當店

·3 分鐘文章

平價兩餸飯係唔少人嘅糧尾恩物,但比起單純以大件夾抵食為招徠,鰂魚涌呢間新店就希望以相宜嘅價錢,供應每日製作、無味精嘅新鮮便當!每日有八款港、日菜式選擇,而且當中兩款係素食,仲有自家湯品同茶飲,日日食都唔會厭呀。

餐廳負責人Yoko希望供應新鮮、健康嘅便當畀各位上班族
餐廳負責人Yoko希望供應新鮮、健康嘅便當畀各位上班族

日食首店位於鰂魚涌海堤街,以健康為理念,希望供應新鮮、健康、無味精嘅便當畀大家。而且菜式、湯品每日更換,就好似餐廳嘅英文名 #FOTD「Food of the day」咁,可以揀到自己心水。負責人Yoko指嚟緊希望可以開到去其他商廈區,令更多打工仔女食到低成本高質素嘅便當。


三品便當($48)
三品便當($48)

三品便當($48)

菜式會先喺自家工場處理同調味,然後送到舖頭再即場製作,Yoko喺開店前就有做過研究,發現坊間同類嘅餐廳大部分提供嘅選擇唔多,好多都係油炸嘅菜式。因此日食就加入日式料理,例如拍攝當日就有豚肉生薑燒、日式照燒雞扒,之前出過嘅蒲燒鰻魚亦相當受歡迎。

(左)牛油香檸焗魚柳,(右)椒鹽排骨
(左)牛油香檸焗魚柳,(右)椒鹽排骨

要打破「頹飯」印象,菜式設計上亦落咗唔少心思,例如圖中嘅牛油香檸焗魚柳就以新鮮檸檬帶起魚肉鮮味,省去多餘調味。之前亦有出過自家香煎手工蓮藕餅、黃金雞卷等心機菜,另外一啲大排檔小炒例如椒鹽排骨、黑椒牛仔骨、蜜椒薯仔牛柳粒都好多人點㗎!

兩品便當($42)
兩品便當($42)

兩品便當($42)

留意到越嚟越多人食素,餐廳每日供應嘅八款菜式當中,會有兩款係素食。其中一款會用新豬肉等植物肉製作,例如拍攝當日就有香辣惹味嘅素麻婆豆腐;另外一款就會係炒雜菜,例如圖中嘅什錦炒蘆筍,之前亦有出過三杯茄子、味噌炒雜菜等。Yoko指出乎意料地唔少客人都會點炒雜菜,好多時候雜菜仲係最快賣完嘅菜式!

自家湯品(單點$18,跟餐+$8)
自家湯品(單點$18,跟餐+$8)

自家湯品(單點$18,跟餐+$8)

湯品每日一款,拍攝呢日係好有住家Feel嘅蕃茄肉碎薯仔湯,湯頭清澈唔會太油膩,仲有唔少蕃茄同薯仔呀。

自家茶飲(單點$20/支,跟餐+$10/支)
自家茶飲(單點$20/支,跟餐+$10/支)

自家茶飲(單點$20/支,跟餐+$10/支)

茶飲同樣自家製,味道天然清甜又有唔同功效:清熱明目菊花茶、美顏潤肺雪梨茶、桂花桂圓清心茶,踏入秋天想潤一潤就最啱喇。

不鏽鋼餐盒($80)
不鏽鋼餐盒($80)

不鏽鋼餐盒($80)

餐廳亦都支持環保,歡迎大家自己帶乾淨嘅餐盒去買便當,帶餐廳嘅餐盒去仲可以減$4!仲可以買埋不鏽鋼餐具($42,餐盒及餐具組合價$108),擺喺Office方便用。

日食
日食

日食
地址:鰂魚涌海堤街18號濱海大廈地下D-4B號舖

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能