【網絡熱話】臨關門買雪糕 職員落閘阻離開 客人反被公審：阻人收工猶如殺人父母

Facebook 群組「雪糕關注組」其中一位管理員近日發文，指自己晚上 8 時 43 分到達旺角商場T.O.P的阿波羅雪糕店，同時間亦有另位兩位客人光顧，發文者形容「當時有兩位職員姐姐，佢見到我哋幾個好似大為緊張咁，然後即刻沖去門口落閘。」

帖文亦提到，購買雪糕後，兩位職員要求所有客人取得雪糕後才開閘，「我同佢講我趕時間，於是佢好唔情願咁搵鎖匙去搞開個閘，搞咗2分鐘先開到，然後就無啦啦講晒鋪入面啲人一次過走，連其他食緊雪糕嘅客食咗半嘅都要出門口。」

發文者翻查店舖時間，指該分店營業時間為中午 12 時至晚上 9 時，形容職員在晚上 8 時 45 分便落閘「太誇張」。

事件隨即引起其他網民熱烈討論，有不少網民支持職員做法，形容「阻人收工尤如殺人父母」，亦有網民指出職員除了整雪糕，亦要清洗雪糕機、結帳等，「趕時間咪唔好食囉！你一篇文，分分鐘人地比人照肺，呢間鋪頭既姐姐出名俾心機！唔該反省下啦！」有網民亦舉例，其他零售業、銀行業亦會提早落閘，私家診所亦會提早一小時截止登記應診。

有網民則認為，職員不應直接落閘阻止顧客離開，「做得呢行，個客西，中意收工前一分鐘玩野，你吹佢唔脹，你可以咒罵佢祖宗18代，但無理由落晒閘唔比人走。」

發文者亦有回應網民留言，澄清自己並非指責 15 分鐘前截單有問題，強調「只係明明有兩個staff，落閘反鎖太誇張，仲要係用鎖匙先開到嗰隻。」他亦不滿意有網民批評他沒有同理心，反問「我唔係8:59走入去買，我係8:43入去買杯takeaway嘅雪糕，咁真係有問題？」亦稱自己不清楚清洗雪糕機要多少時間，「間公司應該set個last order早一個鐘，如果我響last order前買，個責任唔係個客度掛...」