【Do姐有問題】冧過黃翠如?洪永城:有少少...

·2 分鐘文章
冧過黃翠如?洪永城:有少少...
冧過黃翠如?洪永城:有少少...

鄭裕玲(嘟嘟)主持嘅電台節目搵咗蕭正楠做訪問,大談入行經過、拍劇經歷等,被嘟嘟問到同老婆黃翠如嘅愛情故事時,阿蕭都好大方分享!當講到翠如性格男仔頭時,阿蕭笑言:「你見洪永城點對佢就知啦!」

講起洪永城,又點可以唔提佢同翠如嘅關係?兩人一直被外間認為曾經係拖友,甚至當時一張拖手行紅地氈嘅相,更引起網民熱烈討論,指兩人先係天造地設嘅一對!估唔到連嘟嘟都非常好奇,自爆以前同翠如拍《Do姐去Shopping》時,得閒就會「盤問」對方:「有冇同洪永城拍過拖?出咁多次外埠,冇理由冇嘅!」就係翠如同洪永城Friend到實在令人懷疑,阿蕭都自爆話有問過翠如:「冇喎佢話,其實佢哋兩個係有啲介乎討厭對方…哈哈…但討厭得嚟又好啱Key!」

而嘟嘟再自爆,曾經私下問過洪永城同樣嘅問題:「佢話開頭嘅時候,有少少嘅…因為呢個女仔靚嘛,又白雪雪,但合作起嚟就唔得喇,成個男人咁喇,自此之後咁嘅感受完全冇晒,所以你(阿蕭)可以放心!」此時阿蕭就為老婆出頭:「佢又唔應該咁話佢(老婆),佢都唔係咩好東西,洪永城!!!」

嘟嘟笑言依家熱戀中嘅洪永城肥咗好多,隨即被阿蕭取笑做「肥洪」。而最後問到會唔會生B時,阿蕭就話順其自然,佢哋都鍾意周圍飛,當如果有小朋友,人生就要重新規劃!