【8月結婚咁啱三個月】陳凱琳係咪奉子成婚? 陳爸爸笑晒口:你問番佢啦
49歲嘅鄭嘉穎同27歲嘅陳凱琳(Grace)拍拖三年,今年8月12日喺峇里島舉行婚禮,唔少圈中好友都有出席(相關新聞:
),為一對新人送上祝福。好多人都祝佢哋三年抱兩早生貴子,到噚日結婚剛滿3個月多點,佢哋就好夢成真,Grace喺Instagram宣佈有喜:「my husband and I are excited to share one of the biggest gifts that God has blessed us with… We’re having a baby! 」而嘉穎就喺IG以中文寫「感恩節,一個為了慶祝和感激我們所擁有的節日。在這個特別的日子裡,我和我太太想分享一份大禮物,就是我們家庭將會有一個小寶貝」(相關新聞:
)。依照老一輩傳統,為免BB小器,會等大肚婆懷孕滿3個月至會對外宣佈有喜。
一班記者今日去到Grace位於九龍塘嘅娘家等候,即將榮升公公嘅陳凱琳爸爸陳桂祥12點半左右離開大宅時,見到門口有大班記者喺度守候,陳爸爸心情大靚專登行出門口同記者傾偈。大家最關心嘅自然係Grace有咗幾多個月身孕,但係陳爸爸就冇正面回答,只係笑笑話:「呢啲你問番佢啦。」講到會唔會燉啲補品,催谷一向偏瘦嘅囡囡時,陳爸爸話一切會由老婆負責,自己就唔識煮,最多都係同囡囡、女婿出去食飯。至於初為人父人母嘅嘉穎同囡囡有冇好緊張時,陳爸爸話:「都係一般父母心情啦。生仔生女佢哋都冇所謂,平常心。」傾咗分零鐘之後,陳爸爸就入返大宅開車離開。