【BizStarter】年儲十萬用戶！外賣平台Plum 背水一戰「大裁員」

打工仔搵食艱難，而每日面對最大的搵食問題，相信是食晏！現時外賣平台多的是，但本地初創Plum加入戰場，主打白領食晏時段，推出「外賣集運」平台。平台成立未夠一年，已有逾十萬用戶。你以為這是一個創業成功超勵志小品？事實上，公司早前業務增長放慢，更大規模裁員重組，聯合創辦人張漢樑（Desmond）表示，「真係冇得揀，為公司嘅着想，都一定要做。」

今次，又再是一個「有Banker唔做毅然創業」的故事。「我自己都喺中環返工十幾年，食Lunch係要鬥快！」原於投行工作的Desmond，眼見打工仔每日中午時段，為餐晏仔排隊排餐懵，遂與原本經營商務中心、Lalamove早期投資者鍾永良（Andrew），合作推出「外賣集運」平台。

用戶須於早上10時40分前，透過手機App落單，平台就會跨區運送不同餐廳的外賣；與其他外賣平台不同的是，為減低成本，飯盒不會送上門，反而用戶須於中午時段，到附近指定取餐點拎飯盒。

平台去年11月於中環試業，首選地點當然是食肆短缺的區域，「中環有幾幢大廈出名附近冇嘢食，長江中心，同埋花園道ICBC Tower，同埋Champion Tower。」意想不到的是，試運反應理想，一個月後單日訂單數目逾百。時至今日，平台已有10萬用戶，600間合作餐廳、業務遍全港14個地區、高峰時每日訂單接近一萬個，更已打開新加坡市場。記者於ICC取飯點訪問當日，現場所見，有約100名白領先後落樓拎飯，偶爾會出現人龍。

講到平台收入來源，主要是靠餐廳分成。Desmond解釋，由於早餐與午飯之間，餐廳生意相對淡靜，「我哋同餐廳解釋就係話，喺你未忙嘅時段，就落單，咁有個機會做多啲生意。」加上平台每日只會為用戶提供六間餐廳指定菜式，變相確保每間餐廳會有一定數量訂單。

不過，做Startup豈會順風順水，特別做餐飲Startup最怕遇著食物安全事故。今年7月，Plum亦捲入懷疑食物中毒個案。他指案件調查中，未能透露更多，只表示，現時所有飯盒出餐，都會放入加上暖包的保溫袋，更會抽查食物溫度，最遲下午約1時會停派外賣。

屋漏兼逢夜雨，公司本來都未達收支平衡，至於本來火箭式上升的訂單數量，至今年8、9月，突然停止增長，迫使公司要重組削支，於9月大手裁員。他指，公司早期用人手處理大量工序，又聘請大量推廣人員，本來希望職位自然流失，但公司增長放慢，不得已要主動派大信封。惟他不願透露具體裁員人數，只表示是一個大數目。

「簡單啲講，今次重組係wake up call。」目前平台已重新恢復增長，未來會繼續嘗試各種運送模式，研究直接走入大廈大堂送餐，又或與大公司合作；最新亦已試驗推出晚餐服務。另外，公司正在進行A輪融資，短期內未有賣盤考慮。

採訪、編撰：倪敏慧
攝影：卓振輝、馮啟成
編導、剪接：梁依能
編審：陳家文