三隧分流｜西隧凌晨空車優惠取消 夜更的士司機：唔想笠亂過海

運輸署 8 月 2 日實施三隧分流，的士過海隧道費統一 25 元，運輸署稱可增加的士司機過海意欲。不過有夜更的士司機向《Yahoo 新聞》表示，以往西隧凌晨空車過海的 10 元優惠在三隧分流後取消，空車過海成本增加，而且過海的考慮夾雜多項因素，相信因三隧分流而增過海意欲的司機並不多。另有的士司機則指，新措施可減少與過海乘客的爭拗，而且減少塞車時間。兩人均表明三隧分流無助增加收入。

攝影記者：Billy HC Kwok

入行兩年的夜更的士司機Kenny指，三隧分流實施前，如果的士司機在凌晨至早上 7 時沒有載客通過西隧，只需支付 10 元隧道費，還附送一張 5 元優惠卷下次使用，等於 5 元就可以行西隧過海找客人。但此優惠隨三隧分流實施後取消，Kenny 坦言會更謹慎考慮是否空車過海，「而家變咗 25 蚊收費，就盡量唔想笠亂過海囉。」

不想過海原因：交更、唔熟路

他續稱，的士司機的過海意願受很多因素影響，包括交更。大部分的士都是兩更制，日更司機下午 4 時就差不多要準備入石油氣、清潔車廂，準備在 5 時將的士交給夜更司機。交更前司機盡量避開過海或塞車，「交更時間遲過半個鐘，下一更有權唔揸！」

雖然過海塞車時的士仍會跳錶，但 Kenny 說：「一般人覺得唔會蝕，始終個客坐上車個標就跳，（塞車）一分鐘跳一下；但暢通路面 200 米跳一下，大部分的士司機選擇去唔塞車地方。」的士司機普遍「盡量避免喺最塞車時候行最塞車嘅路」，才能爭取最多的收入。

Kenny續指，每個的士司機都有做生意的「心法」，對於過海的態度不一。他一直是願意過海的司機，「（以前）幾唔想行紅隧都要去㗎啦，反正我哋心態係，你見完個客呢次，都未必有第二次，咁咪由佢囉！」但他稱不少司機不想過海的原因包括「唔熟路」，「香港 2,000 幾條街，6、7,000 棟樓，邊可能全部會記得㗎？」的士司機一般了解主要道路、標誌建築和大型屋苑，但未必熟悉每一個地區，「好似我如果（過海）去到天水圍、屯門，我都老實講，唔係好熟路，都係靠導航㗎。」不少司機喜歡做熟悉區域的生意，覺得有安全感，亦知道那裏有客源，「有啲司機未必想喺港島等，因為唔熟悉區環境、生態......三隧分流吸引司機過海？有嘅，但唔會多囉。」

的士司機 Bill 入行 5 年，看法與 Kenny 截然不同。他認為隧道統一的士收費，司機變相增加回程隧道費的收入。以往的士只向過海客人收 10 元回程隧道費，東隧、西隧則收 15 元，現時就統一收 25 元。Bill 認為是重要的額外收入，「10 轉就 250 元......當 100 元嗰支 order，（25 元回程費用）差唔多 25%。」但淨賺25 元的前提是要找到客人過海回程。

他說三隧分流前，不少客人為了節省隧道費，放棄較快的西隧或東隧過海，取道紅隧。偶爾有客人無表明選擇那條隧道過海而出現爭拗，「前幾個星期試過接個客喺深旺道嘅，喺美孚嗰邊，佢話要快，我行咗西隧，佢就喺度嘈囉！」三隧分流避免了這類爭拗，「而家唔駛諗，隧道價錢一樣，圓方（商場）一落去就西隧過港島，最快脆。」

Bill 目前在理工大學過紅隧，普遍只要 5 至 10 分鐘，較以往快一倍，亦無需為行那條隧道起爭執，已經輕鬆得多，「唔會黑口黑面，一定衝突少咗。」節省塞車時間，就可多接生意。Bill 分析：「（以前）如果一來一回都行紅隧，真係隨時嘥 30 分鐘至 60 分鐘都有，（司機）一個鐘叻仔最少搵 220 元！」

通關後收入跌兩成

三隧分流實施約一周，兩位受訪司機都表明，未肯定收入會否增加。Kenny 更慨嘆，的士司機整體收入反而不及疫情期間，「收入差兩成，自從通關、復常之後，對的士收入係有減無增！」他指九成搭的士都是本地人，現時港人假期和周末都選擇外遊或返內地玩樂，對本地的士需求減少。

Bill 亦有類似感受，「少旅客、（市民）少出夜街！」即使實施三隧分流，仍無助增加生意，「你要啲人肯嚟香港先得，以前就好多外地旅客嘅，夜晚蘭桂芳、尖沙咀好旺市嘅，而家平日夜晚好靜......歐美、日本、東南亞都少，你話大陸旅客係有，但嗰啲好少搭的士，外地旅客爽手啲，求快，搭的士多啲。」