中年好聲音︳李佳 龍婷 吳大強 周吉佩 羅啟豪 顏志恆入決賽 支嚳儀失聲演出被淘汰
《中年好聲音》完成最後一場累積計分賽,並決出決賽6強名單,按分數排列分別係李佳、龍婷、吳大強、周吉佩、羅啟豪及顏志恆。而「顏值擔當」支嚳儀最終以第7名「畢業」。
喺呢場歌手合唱賽之中,各組演出水準可以話係咁多集以嚟最高。本身實力強勁嘅李佳同谷婭溦合唱《一路上有你》交出高水準演出,而且評判認為二人聲線能夠互補,值得高分。而龍婷同彭家麗嘅《一切也願意》就突破「小龍女」過去嘅風格,同樣令評判勁buy。不過最爆嘅可能係吳大強,因為佢同韋綺姍合唱Today I Celebrate My Love For You,直情好似婚禮現場咁,睇到全場嘩聲四起,臨尾Bill哥哥仲鍚咗韋綺姍一啖!連肥媽都話Bill哥哥參加比賽「係嚟溝女」,不過呢種倜儻味道亦都得到全晚最高嘅91分。
但係全晚MVP就落喺過去未太能夠留下印象嘅周吉佩。佢同太極樂隊主音雷有輝合唱《留住我吧》及《情人》,被評判周國豐盛讚「最想見嘅周吉佩返嚟啦」。嘉賓評判陳潔靈最後揀咗周吉佩、龍婷同吳大強做MVP候選人,但因為吉吉嘅演出純粹以音樂取勝,令佢首次成為MVP。
至於本身處於淘汰邊緣嘅支嚳儀因為演出前失聲而受影響,加上選唱嘅Can’t Take My Eyes Off You連陳潔靈都話難唱,未能爭取分數,最終成為累積分數最低一名而出局。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!