中年好聲音3丨Ever主音何家豪攜愛女遺物參賽 前亞視男星曾4個月內「兩度做人父」惹熱議

TVB歌唱真人騷《中年好聲音》第一及第二季，吸引一班唱功一流嘅隱世中年參賽者參加，節目播出後好評如潮，節目組喺6月宣布招募第三季參賽者。有指將於9月中開播嘅《中年好聲音3》至今舉行多次海選，包括星馬區、大灣區及香港區。而日前（12-13日）就喺香港進行最後兩日海選，除咗吸引唔少素人参加之外，仲有唔少藝人及熟悉嘅面孔參加。

《中年好聲音3》喺8月12及13日進行香港區最後兩日海選，成功吸引過千名市民報名參加，當中不乏熟悉面孔及家屬，包括前歌手可嵐、前Square成員趙浚承、前《亞洲電視亞洲星光大道4跳舞吧》季軍李創偉、樂隊Ever主音何家豪、《聲夢傳奇》蔡愷穎爸爸、及何婉盈哥哥等等。可嵐表示自己喺過去兩年都懷孕，所以就冇參加第一及第二季；趙浚承就喺因龍婷及鄭梓浩嘅推動下報名；而李創偉早前參與ViuTV戀愛真人騷《阿女又戀嚟》時自揭曾戀同性惹嚟唔少討論，去年底升呢做人父嘅佢相隔4個月再宣布二女出世，令到唔少人都對佢嘅感情生活非常好奇。

至於樂隊Ever主音何家豪，當日佢係拎住囡囡嘅遺物結他自彈自唱，佢表示屋企喺三個月前發生咗一件唔開心嘅事，就係佢8歲嘅囡囡因急病離開，而佢手上嘅結他就係佢喺一月送俾囡囡嘅生日禮物，佢仲話囡囡係一個好鍾意音樂及唱歌嘅小朋友，所以囡囡好想拎住呢支結他去台上表演，但可惜佢無法完成呢件事。喺完成他自彈自唱《擁抱這分鐘》後，佢就表示估計囡囡在天之靈會聽得到，因為囡囡出世之後佢都成日喺囡囡房間唱歌，就算而家佢都照咁樣做。另外，佢唔想用自己個名參賽，佢選擇用「桃爸」呢個名，因為咁樣可以同囡囡有聯繫。聽完之後，評判肥媽Maria Cordero及周國豐都忍唔住流眼淚。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！