中年好聲音3 海選︳區瑞強細佬 譚輝智親戚 空姐牛肉飯 豬欄歌王出場 邊個會入圍？

TVB《中年好聲音3》開始進行海選，一如往年同樣喺youtube直播過程。過去有唔少前歌手、藝人家屬、生命鬥士同各行各業素人參賽，但係首輪海選前歌手未見出場，至於比較出眾嘅參加者都有好幾位。

過去有李玟二家姐李思林、孫耀威細妹孫美賢參加《中年好聲音》，今屆至今有《中2》亞軍譚輝智堂姐譚旨經、「靚歌王子」區瑞強細佬區瑞明參賽。譚旨經自我介紹時話係譚輝智同家人叫佢一定要參加，否則會後悔。譚旨經以張惠妹嘅《藍天》參賽，但係唱咗半首就被叮走。而區瑞明演唱英文歌What a Wonderful World就被評審讚不絕口，似乎有望入圍。同區瑞強喺港台做過同事嘅周國豐仲話區瑞明唱歌咀型似Albert，但係唱出嚟唔似。區瑞明話因戚哥哥嘅關係，即使想參加都有壓力，而今次係佢個女幫佢報名。

TVB總經理曾志偉有出席海選，而志偉哥就喺視障參加者朱麗萍演唱If I Ain’t Got You時聽到落淚。朱麗萍話參賽係希望更多人聽到視障者嘅聲音，朱得知曾志偉為佢而喊時亦激動落淚。朱麗萍老公蕭家賜亦一同參賽，但佢對自己入圍信心不大，認為帶太太海選已經完成任務。

曾經開設「空姐牛肉飯」食店嘅郭德英都現身海選。「空姐」介紹時自稱係旅行社負責人，而翻查資料佢嘅牛肉飯鋪頭已經喺去年4月結業。郭德英選唱林憶蓮版本《難忘你》，評審海兒認為佢音色靚而且有感情，其他評判都俾正評，入圍唔意外。「牛」以外仲有「豬」，自稱係養豬人嘅胡家奇（讀音）演唱《倩影》，被評審與第一季唱同一首歌嘅鮑聖光相提並論，指兩人水準相若。表現輕鬆嘅胡家奇受到評審歡迎，似乎同樣有機會晉級。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！