亞視神劇《我和殭屍有個約會》20週年 齊齊重溫劇集經典

近年，越嚟越多劇集以疆屍及喪屍為題材，不過對於香港人最深刻同喜歡嘅一定數到亞視劇集《我和殭屍有個約會》，當年成功吸引唔少觀眾集集追。劇集除咗帶動「殭屍」熱潮之外，佢仲成功打破無綫慣性收視嘅定律，真係好犀利㗎！唔經唔覺今年已經係《我和殭屍有個約會》第一輯播出20週年，不如今日我哋就同大家一齊重溫下當年之經典啦！

主題曲夠經典
一套劇嘅成功，除咗可以歸功於劇本及演員之外，一首出色嘅主題曲都好重要㗎， 《我和殭屍有個約會》主題曲《夢裡是誰》搵咗王馨平主唱，當中歌詞「將來若真的再有個約會會完成 真的會再有這樣深情」，真係望到啲字都有聲。呢首歌絕對係《我和彊屍有個約會》鐵粉之間嘅Best kept secret，真係一講即明，冇睇過嘅朋友唔會明。而另一首唱到街之巷聞嘅就係第二集主題曲《假如真的再有約會》，就由蔣嘉瑩主唱。

經典角色深入民心
劇集雖然已經播咗咁多年，不過劇中有唔少角色仍然深入民心，令觀眾印象深刻㗎~

1. 馬小玲（萬綺雯飾）

萬綺雯飾演如花貌美嘅馬小玲，角色深入人心。有「南毛北馬」之稱的驅魔龍族馬氏一家第四十代掌門人，脾氣古怪而且特別愛錢，好鍾意同對手尹天照講錢。但性格嬌嗲既善良。經營一間「清潔公司」靈靈堂，法力非常高強，偏偏就因為馬家祖先的詛咒而唔能夠流眼淚，一流眼淚就將失去法力，更與況天佑有一段愛情故事。不過大家最記得嘅一定係佢著短裙，大騷佢一雙白滑長腿。

2. 況國華（尹天照飾）

雖然尹天照已經淡出娛樂圈，但佢喺劇中飾演嘅型格二代殭屍況國華（後期以其孫況天佑出現）絕對係佢嘅代表作。喺劇集初期，尹天照喺劇中飾演抗日戰爭時期一個中國游擊隊隊長況國華。之後況國華為免禍及村民，所以決定同山本一夫（陳啟泰飾）決一死戰，期間殭屍王突然出現，仲咬咗佢哋，令佢哋變為不老不死、以血為生嘅吸血殭屍。

3. 山本一夫（陳啟泰飾）

奸角山本一夫本身係冷酷無情嘅一位日軍，因身為游擊隊的況國華（尹天照飾）炸死其親父，種下深受大恨，決定要將國華非殺不可。山本一夫回國後無法面對自己變成殭屍嘅事實，直到自己妻子阿雪嘅死，試圖將全世界都變成只有殭屍嘅世界。事情被國華知後，國華決定阻止。經過一輪戰鬥，佢終於記得自己係為萬世以前阻止羅侯五戰士中嘅天勇者，佢更記得自己係用功力幫助國華去毀滅受羅侯支配嘅自己，都可以話係救世主之一。

4. 王珍珍（楊恭如飾）

王珍珍係馬小玲（萬綺雯飾）嘅好朋友，所以戲份當然一啲都唔輕啦！
劇中為佢係一位友善嘅小學老師，同馬小玲一樣樣貌甜美之外，佢個性比較天真及善良，最唔叻講大話。講都冇人信佢同馬小玲一樣竟然因為唔同嘅原因及經歷而愛上國華！最估唔到因為佢樣貌同日軍山本一夫嘅妻子阿雪相似而陷入危機。因為一度瀕死而被國華咬成殭屍，後來被施法控制成為葬月儀式生祭。儀式上佢更諗起自己係萬世以前天勇者嘅未婚妻，所以被羅候力勸附身嘅日軍山本一夫，最後被以魔用刀刺死。

5. 山本未來（張文慈飾）

張文慈飾演嘅山本未來係山本一夫（陳啟泰飾）嘅愛女，因為爸爸唔願意再經歷喪親而將女兒咬成殭屍，後來又因為有吸血慾望將愛人咬成殭屍。而馬小玲（萬綺雯飾）一家因為殺死山本一夫後，未來可以恢復正常人身份而同愛人結婚更有一子，可以話係愛情大過天，但因為親父山本一夫突然復活而被收回殭屍血並死去。

6. 金正中（杜文澤飾）

喺劇中出名喺嘉嘉大廈居住，初期更以「玄武童子」之名轉世，用唔同偷呃嘅手法再加上招搖撞騙做神棍為生。最終悔改，更加有幸認識馬小玲並且收佢為徒弟，武器為佛掌。最終因為阻止「葬月」儀式被羅侯一劍穿肚而死。

經典場面
好多網民都應該知道《我和殭屍有個約會》係一套集合古裝味道又充滿現代感嘅劇集，以當年嘅劇集嚟講可以叫做大製作。編劇更加插好多科幻成份嘅特技場面。有好多戰鬥場面及，斬妖取魔嘅鏡頭真係令人拍手叫好及驚嘆不已！

講到經典嘅場面代表之一，一定係所有人成為彊屍時嘅一對紅眼睛。因為20年前嘅技術資源有限，所以好多特效及畫面都較為粗糙。不過每個演員都將角色性格發揮得淋漓盡致。例如況國華嘅皮外套、馬小玲最省鏡嘅長腿同埋佢嘅九字真言都係劇集中嘅標誌之一，雖然中段無厘頭咁加插左許仙和白娘子嘅劇情，不過仍然無傷大雅，殭屍打鬥場面歷歷在目。