人到中年 隨遇而安 黎耀祥滿意成就：發夢都笑醒！

黎耀祥演技已去到爐火純青境界，與他合作的後輩統統都表示獲益良多。祥仔受訪時指自己40多歲才做主角，人到中年可說是毫無執着，隨遇而安，笑言：「依家咁樣發夢都笑醒啦！」

視帝黎耀祥於現正播映的無綫新劇《輕．功》中，以內斂實在、點到即止的演技演繹出催淚、感人情節，再被網民力讚為神級演技。《輕》劇是一套親情小品，祥仔分別與龔慈恩、蔣祖曼及朱敏瀚上演夫妻間的愛與不捨、父親與子女間的代溝、矛盾。劇中內容說到中年追夢，希望大家能放下執着，祥仔亦坦言向來隨遇而安，凡事看得開。他謂：「我40幾歲先做主角，執着喺後生時都會，仲會有團火，但好快就過，我都幾阿Q精神，做2、3線角色都覺得好好玩，好容易平衡到自己，呢10幾年有咁嘅成績夠晒喇！真係發夢都笑醒呀！」

同兒子零代溝最安慰

說到劇中跟女兒蔣祖曼總是不咬弦，矛盾多多，現實中，祥仔與兒子黎正橋反而毫無代溝，他說：「我份人好老實、家庭型，個仔又係理性型，大家好講道理，佢由小學、中學到去美國讀書我哋都一齊，依家佢25歲，我同老婆去內地做嘢，佢都成日同我哋facetime，咁多年來一直都冇距離。」現時工作之餘，祥仔與太太享受美滿人生、知足常樂，他說：「以前劇接劇，依家咪搵番自己嘅生活囉！簡簡單單，人生已經好美滿。」

而前晚播出的一集，蔣祖曼上演多場喊戲，她受訪時透露拍攝前不斷請教其他演員「喊功」：「祥哥話佢本身都硬淨，喊戲都要時間準備，但佢人生經歷比較多，諗起某啲事就比較容易喊出嚟。」