人夫放假約出去滾｜徐榮年少時自認靚仔過林峯 細女徐心怡2歲已交稅

由林盛斌（Bob）主持嘅J2節目《人夫放假約出去滾》邀請好多唔同嘉賓上去傾下計，近日就邀請徐榮喺節目大談人生唔同階段。徐榮喺讀藝員訓練班入行，同屆同學有唔少已經成名，有林峯、楊茜堯（前名：楊怡）、楊明、張美妮等等，徐榮講起當初只得4,000元薪金，成班同學都想盡辦法慳錢食飯；有日同學搵到間餐廳做推廣，只要喺半小時內食晒2.5磅意粉，嗰餐就可以免費，之後佢哋幾個同學一齊去挑戰。成班同學中，竟然係張美妮第一個食完，嚇到其他同學即刻食晒，否則要畀300蚊。但最後李忠希都係食唔晒，大家夾份畀錢，每人幾十蚊。

藝訓班畢業後，林峯極速上位，而楊茜堯捱咗一輪都慢慢上位。徐榮當時成日諗「阿峯做啲戲，我都做到吖，最多係佢靚仔少少？但我都唔覺得呀！讀訓練班嗰陣，我覺得自己係金城武嗰種，睇自己特別靚仔，我當時覺得自己靚仔過林峯呀！」佢曾經諗過出外闖下，但離開TVB又心有不甘。於是佢不斷心理建設，加強再加強。直至近年徐榮慢慢有啲人氣，佢係唔同類型的角色上，造型上都花咗唔少心思，俾觀眾見到不一樣嘅佢。

講到感情生活，徐榮同女朋友拍拖兩年就決定結婚，佢形容兩人嘅愛情非常舒服自然，後來決定有小朋友就結婚啦！結婚之後兩公婆一切以小朋友為先，小朋友畀到一種凝聚力，佢想像唔到無小朋友關係點走落去。而家大仔徐朗喺英國體育學校讀書，佢仔仔好想做足球員，佢同個仔講入唔到球隊就要返香港踢波同讀書，估唔到阿仔學業成績都幾好。而細女徐心怡（包包）自細就接拍廣告幫自己賺奶粉錢，2歲人仔已經收到稅單要交稅。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！