任達華凍傷留疤 頂硬上開工

東方日報
·2 分鐘文章
任達華於大坑開工,不時向圍觀者打招呼,十分親切。
任達華於大坑開工,不時向圍觀者打招呼,十分親切。

剛度過66歲生日的影帝任達華,早前於內地拍戲凍傷雙手,至今仍未痊愈,近日他頂硬上開工拍打戲,果然是硬漢一名。

疫情下任達華依然片約不斷,近期化身「任三組」,先後接拍電影《金手指》、《邊緣行者》及《被消失的凶案》。日前他被發現現身大坑天后廟,與任賢齊(小齊)、譚耀文及林曉峰等為《邊》片開工,等埋位時眾人坐於廟外化妝及閒聊,氣氛愉快,阿譚更請食潤喉糖,氹到大家相當開心。

譚耀文多動作戲

任達華與門外等候的粉絲親切打招呼,期間不經意攤開雙手,竟被發現滿是瘡疤,手背脫皮兼皺起,他解釋:「之前喺山東泰安等地拍另一齣電影《挑山》,高山上溫差太大,返到嚟發現雙手凍傷咗,睇咗醫生嘞,情況已有改善,希望快啲好番,多謝大家關心。」家底豐厚的他坦言如今拍戲為興趣,即使再辛苦,只要劇本夠吸引,他仍樂意演出,永不言休。

至於阿譚則透露與小齊及任達華的對手戲比較多:「今次動作場面比較多同有難度,開工兩日後大家已經好攰,又有人傷咗,不過劇組好體貼,安排咗物理治療師跟場,如果我哋覺得有需要嘅話,就排隊接受治療,大家仲講笑咁話好似派籌等睇醫生咁。」

落重本多機拍攝

據悉,其中一場動作重頭戲,出動超過60名臨時演員於祠堂外對打,為有更理想的效果,今次更不惜工本回復「多機拍攝」,製作相當認真。

譚耀文一邊拉筋,一邊與任達華及林曉峰吹水。
譚耀文一邊拉筋,一邊與任達華及林曉峰吹水。