企業強人｜謝東閔告別作參考陶大宇演繹情緒崩潰 被網民嫌演技浮誇

以現代商業為題材嘅TVB劇集《企業強人》正在熱播中，劇集搵嚟陳豪、譚俊彥、龔嘉欣及張曦雯等人主演，主要講述巨企「世代物流」與「成峰資本」嘅角力交戰，最新劇情就講到邢文浩（姜大偉飾）為保敬圖，教唆大仔邢啟超（謝東閔飾）偽造文件。敬圖股價持續低迷，而文浩因股票失利而萌輕生念頭，但佢冇勇氣跳落去。文浩向銀行告發大仔偽造文件，之後仲用花言巧語氹啟超幫佢扛罪，最終啟超無奈答應。

謝東閔喺劇中飾演邢文浩大仔邢啟超，對投資唔熟悉，所以成日輸錢，喺爸爸心目中係一個敗家仔。喺最新劇情中，佢慘被爸爸告發偽造文件，之後返公司搵爸爸攤牌時，表情肉緊兼眼淚鼻涕盡出，情緒大崩潰。今次《企業強人》嘅演出，係謝東閔離巢TVB嘅告別作。有指今次邢啟超呢個角色係參考《大時代》嘅丁益蟹（陶大宇飾），監製Marco事前叫佢翻煲《大時代》攞靈感，而佢亦認為係有助佢入戲，而TVB官方頻道亦有將《企業強人》謝東閔及《大時代》陶大宇剪輯成影片作比較。

雖然謝東閔落力演出，但可惜得唔到網民嘅認同，紛紛留言認為佢嘅表情及演技浮誇，例如「演技浮誇到呢」、「謝東閔演得好浮誇，話佢進步我又唔係甘（咁）覺」、「謝東閔演技冇進步-離巢係對的。」、「來來去去，幾個表情...無深度...」、「太作狀，尤其是佢燈大隻眼，太誇張」及「演無能二世祖over 左，似有燥狂症黑社會大佬，難怪無突破，上唔到位」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！