中年好聲音3｜男參賽者高菲唱出女聲溫婉感 驚艷評審團和網民：有乜理由係男？

由車婉婉主持嘅TVB歌唱真人騷《中年好聲音3》新增新馬、大灣區兩個賽區，共有15個來港參賽嘅名額。昨日（22日），一班大灣區歌者於《中年好聲音3之決戰大灣區》同覓音樂夢，其中10位參賽者率先揭開戰幔，評審團則有肥媽、張佳添、周國豐、巫啟賢和曾路得，其中有男參賽者擁有一把天籟女聲，唱出女性嘅溫婉感，又有參賽者撞樣藝人。

10名參賽者中，最令網民留下印象嘅係46歲報稱自由工作者嘅男參賽者高菲，高菲不但留有長髮，更因一把女聲驚艷評審團和網民，佢演繹完《祝福》之後，被張佳添激讚驚喜：「你話係男兒身，你係講真？一個男仔有把咁嘅聲音，係好Amazing！一啲好成功嘅男歌手，通常把聲都係中性、甚至帶點女性化，例如Michael Jackson、周深，呢個係上天賜畀你嘅。」周國豐亦直指嚇咗一跳，大讚高菲唱到首歌嗰種溫婉。一班網民喺網上討論區留言驚訝高菲竟然係男人：「估唔到，佢連打扮都好女性化」、「根本連個樣都似女！但有乜理由係男？」、「佢一出嚟我仲話佢點解無搽口唇膏？」、「問100個人，應該無兩個話佢係男人」等等。另外，同樣報稱自由工作者嘅40歲范夏華和報稱和音歌手嘅36歲梁文君歌唱實力亦不容忽視，前者獻唱《你把我灌醉》，歌聲與歌手G.E.M.（鄧紫棋）相似，又撞樣視后林夏薇；後者獻唱《歸來吧》，被張佳添大讚唱出夭心夭肺嘅感覺，帶到入隻歌嘅境界。

不過，都有參賽者表現未如理想，例如姬麗婷獻唱《到此為止》被巫啟賢直指表現唔穩定：「你成隻歌有時得有時唔得，但至弊係唔知幾時得幾時唔得，你可能係3米跳台高手，但你硬要揀10米，撻死你呀真係！」。曾參加友台歌唱比賽嘅黃文韜和吳帆都被指失準，報稱係人力資源行政人員嘅黃文韜獻唱《祝君好》，被周國豐批評比以前退步，而報稱演唱會場館營運人員嘅吳帆則獻唱《今生今世》，不過因緊張影響表現，周國豐表示睇到吳帆由頭到尾都好緊張：「呢樣係嚴重影響表現，呢個你必須克服，因為呢條路可能有排行。」

另外，除咗梁文君被指撞樣林夏薇，39歲報稱自由工作者嘅姬麗婷嘅外貌亦與《東張西望》前主持黃穎君相似。姬麗婷活躍於網絡，不時於抖音平台上載唱歌片，擁有逾10萬粉絲。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！